*खेड :* वटपौर्णिमेचे औचत्यि साधत भारतीय जनता पक्ष, खेड शहराच्या वतीने प्रभाग क्रमांक ६ मध्ये वडाच्या रोपांचे वाटप करून पर्यावरण संवर्धनाचा प्रेरणादायी उपक्रम राबवण्यात आला. माजी नगराध्यक्ष अॅड. वैभव खेडेकर यांच्या उपस्थितीत विद्यमान नगरसेविका वैभवी वैभव खेडेकर यांच्या हस्ते महिलांना व नागरिकांना वडाची रोपे वितरित करण्यात आली.
परंपरा आणि पर्यावरण संवर्धन यांची सांगड घालणाऱ्या या उपक्रमाला माता-भगिनींसह नागरिकांनी उत्स्फूर्त प्रतिसाद दिला. अनेक महिलांनी वडाचे रोप स्वीकारून त्याचे संगोपन करण्याचा संकल्प केला. पर्यावरण संरक्षणाचा संदेश देणाऱ्या या अभिनव उपक्रमाचे उपस्थितांनी स्वागत करीत त्याचे कौतुक केले. या वेळी संदीप सासने, समीर जंगम, आनंद खेडेकर, भाजपचे सोशल मीडिया प्रमुख सर्वेश पवार यांच्यासह कार्यकर्ते व नागरिक उपस्थित होते.
‘एक वडाचे रोप म्हणजे केवळ एक वृक्ष नव्हे, तर येणाऱ्या पिढ्यांसाठी सावली, शुद्ध हवा आणि हरित भविष्याची अमूल्य भेट आहे’, असा संदेश या वेळी देण्यात आला. पर्यावरण संवर्धनासाठी अशा उपक्रमांची गरज असून, नागरिकांनी वृक्षारोपणासह वृक्षसंवर्धनालाही प्राधान्य द्यावे, असे आवाहनही करण्यात आले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
