चिपळूण भाजपमध्ये मोठा राजकीय भूकंप! तालुकाध्यक्ष उदय घाग यांचा तडकाफडकी राजीनामा; जिल्हा नेतृत्वावर उघड नाराजी…

Spread the love

निवडणुकांच्या तोंडावर भाजपला धक्का; संघटनात्मक कामात डावलले जात असल्याची राजीनामापत्रातून खंत..

चिपळूण | प्रतिनिधी- रत्नागिरी जिल्ह्यात आगामी ग्रामपंचायत निवडणुका आणि जिल्हा मध्यवर्ती सहकारी बँकेच्या निवडणुकीच्या पार्श्वभूमीवर चिपळूणमध्ये भाजपमधील अंतर्गत नाराजी उघड झाली आहे. भाजपचे चिपळूण पश्चिम ग्रामीण तालुकाध्यक्ष *उदय घाग यांनी आपल्या पदाचा तडकाफडकी राजीनामा दिला आहे.* जिल्ह्यातील पक्ष नेतृत्वाच्या कार्यपद्धतीवर नाराजी व्यक्त करत त्यांनी आपले राजीनामापत्र भाजपचे जिल्हाध्यक्ष सतीश मोरे यांच्याकडे सुपूर्द केले. या घडामोडीमुळे चिपळूणसह रत्नागिरी जिल्ह्याच्या राजकीय वर्तुळात चर्चांना उधाण आले आहे.

राजीनामापत्रातून संघटनात्मक नाराजी उघड

उदय घाग यांनी आपल्या राजीनामापत्रात पक्ष संघटनेत काम करताना पदाची आणि जबाबदारीची अपेक्षित दखल घेतली जात नसल्याची खंत व्यक्त केली आहे. पक्षाच्या संघटनात्मक कामासाठी प्रामाणिकपणे वेळ देऊन कार्यकर्त्यांना सोबत घेऊन काम करण्याचा सातत्याने प्रयत्न केला; मात्र त्याची अपेक्षित दखल घेतली जात नसल्याची भावना त्यांनी व्यक्त केली आहे.

स्थानिक पातळीवरील निर्णयप्रक्रियेत पदाधिकारी आणि कार्यकर्त्यांच्या मतांना अपेक्षित महत्त्व मिळत नसल्याने मनात तीव्र नाराजी निर्माण झाल्याचेही त्यांनी पत्रात नमूद केले आहे. पक्षाच्या कामासाठी अनेकदा परिस्थितीशी जुळवून घेतले; परंतु सध्याच्या परिस्थितीत तालुकाध्यक्ष म्हणून जबाबदाऱ्या प्रभावीपणे पार पाडणे योग्य वाटत नसल्याचे त्यांनी स्पष्ट केले.

‘वैयक्तिक स्वार्थासाठी नव्हे, नाराजी व्यक्त करण्यासाठी निर्णय’

भारतीय जनता पार्टीच्या चिपळूण पश्चिम तालुकाध्यक्षपदाचा राजीनामा स्वेच्छेने देत असल्याचे उदय घाग यांनी पत्रात म्हटले आहे. हा निर्णय कोणत्याही वैयक्तिक स्वार्थातून घेतलेला नसून, पक्ष संघटनेतील सध्याच्या परिस्थितीबद्दलची नाराजी आणि मनातील खंत व्यक्त करण्यासाठी घेतल्याचे त्यांनी स्पष्ट केले आहे.

पक्षाने या बाबींचा गांभीर्याने विचार करावा, अशी अपेक्षाही त्यांनी व्यक्त केली आहे. आजपर्यंत पक्षाने दाखविलेला विश्वास तसेच वरिष्ठ नेते, पदाधिकारी आणि कार्यकर्त्यांकडून मिळालेल्या सहकार्याबद्दल त्यांनी आभार मानले आहेत. आपला राजीनामा स्वीकारून पदाच्या जबाबदारीतून मुक्त करावे, अशी विनंतीही त्यांनी केली आहे.

कोण आहेत उदय घाग?

उदय घाग हे सावर्डे परिसरातील दहिवली गावचे सुपुत्र असून, महाराष्ट्र नवनिर्माण सेनेच्या शाखाप्रमुख पदापासून त्यांच्या राजकीय प्रवासाची सुरुवात झाली. मनसेमध्ये त्यांनी सुमारे १७ वर्षे काम केले. या काळात त्यांनी चिपळूण उपतालुकाध्यक्षपदाची जबाबदारीही सांभाळली होती. याशिवाय, त्यांनी दोन वर्षे तंटामुक्त समितीचे अध्यक्ष म्हणून काम केले.

सुमारे दोन ते तीन वर्षांपूर्वी त्यांनी मनसेतून भाजपमध्ये प्रवेश केला. चिपळूण तालुक्यातील ग्रामीण भागात, विशेषतः सावर्डे परिसरात विविध सामाजिक आणि आरोग्यविषयक उपक्रमांमध्ये त्यांचा सहभाग राहिला आहे. चिपळूण पश्चिम तालुकाध्यक्षपदाची जबाबदारी स्वीकारल्यानंतर सावर्डे परिसरात भाजपचे कार्यालय सुरू करण्यामध्येही त्यांनी महत्त्वाची भूमिका बजावली.

राष्ट्रवादी काँग्रेसमध्ये प्रवेशाच्या चर्चांना वेग?

भाजपमधील नाराजीनंतर उदय घाग पुढील राजकीय वाटचालीसाठी कोणता निर्णय घेतात, याकडे सर्वांचे लक्ष लागले आहे. उपमुख्यमंत्री सुनेत्रा पवार यांच्या नेतृत्वाखालील राष्ट्रवादी काँग्रेसमध्ये, चिपळूणचे आमदार शेखर निकम यांच्या नेतृत्वावर विश्वास ठेवून प्रवेश करण्याची त्यांची तयारी असल्याची चर्चा राजकीय वर्तुळात आहे. मात्र, याबाबत अधिकृत घोषणा झालेली नसल्याने त्यांच्या पुढील राजकीय भूमिकेबाबत अद्याप स्पष्टता नाही.

भाजपचे वरिष्ठ नेते काय भूमिका घेणार?

आगामी स्थानिक स्वराज्य संस्थांच्या निवडणुकांच्या पार्श्वभूमीवर तालुकाध्यक्षाने राजीनामा देणे ही भाजपसाठी महत्त्वाची राजकीय घडामोड मानली जात आहे. या राजीनाम्यामुळे पक्षातील अंतर्गत मतभेद, स्थानिक नेतृत्वाची कार्यपद्धती आणि कार्यकर्त्यांच्या अपेक्षांचा मुद्दा ऐरणीवर आला आहे.

आता भाजपचे जिल्हाध्यक्ष सतीश मोरे आणि पक्षाचे वरिष्ठ नेते या प्रकरणाची कशी दखल घेतात, राजीनाम्याबाबत काय निर्णय घेतात आणि उदय घाग यांची पुढील राजकीय दिशा कोणती असते, याकडे राजकीय निरीक्षकांचे लक्ष लागले आहे.

निवडणुकांच्या तोंडावर चिपळूण भाजपमध्ये निर्माण झालेल्या या नाराजीच्या पार्श्वभूमीवर आगामी काळात जिल्ह्यातील राजकीय समीकरणांमध्ये काही बदल होणार का, हा चर्चेचा केंद्रबिंदू ठरला आहे.