चिपळूण : मुंबई-गोवा महामार्गावरील परशुराम घाटातील गॅबियन वॉलचा भराव खचल्यानंतर याठिकाणी मुंबई-पुणे द्रुतगती महामार्गावरील लोणावळा, खंडाळा घाटाच्या धर्तीवर परशुराम घाटातही ‘व्हाया डक्ट’ पूल उभारण्याच्या हालचाली सुरू आहेत. त्यासाठी राष्ट्रीय महामार्गाने निविदा प्रक्रिया राबवून पुलाचा आराखडा तयार करण्यासाठी थॉट कन्सल्टन्सी या एजन्सीची नेमणूक केली आहे. या एजन्सीमार्फत पुलाचा आराखडा तयार करून तो प्रस्ताव केंद्र शासनाकडे मंजुरीसाठी ठेवला जाणार असल्याची माहिती राष्ट्रीय महामार्ग विभागाकडून देण्यात आली.
मुंबई-गोवा महामार्गावरील साडेपाच किलोमीटरच्या परशुराम घाटात सुरक्षिततेच्या दृष्टीने उभारलेली गॅबियन वॉल यावर्षीही तितकीच डोकेदुखी बनली आहे. गतवर्षी पावसाळ्यापूर्वी गॅबियन वॉलची कामे पूर्ण करण्यासाठी धावपळ सुरू हाेती. मात्र, मे महिन्याच्या अर्ध्यावरच पावसाने हजेरी लावल्याने कामाच्या नियोजनाचे तीनतेरा वाजले. परिणामी अर्धवट स्थितीत असलेली गॅबियन वॉलही ठिकठिकाणी कोसळू लागली. त्यामुळे महामार्ग विभागाने गॅबियन वॉलसह घाटातील सुरू असलेली कामे पूर्णपणे थांबवली होती. तसेच एकेरी वाहतूक सुरू ठेवली होती.
यावर्षी गॅबियन वॉलच्या रचनेत काही किरकोळ बदल करून पुन्हा काम सुरू केले. हे काम पावसाळ्यापूर्वी अत्यंत घाईघाईने काम पूर्ण केल्याने पहिल्याच पावसात गॅबियन वॉलच्या पायथ्याशी असलेला भराव वाहून गेला आहे. तसेच नव्याने केलेले काँक्रिटीकरणही खचले आहे. आता घाटात तात्पुरत्या उपाययोजना म्हणून कोसळलेल्या संरक्षक भिंतीच्या ठिकाणी प्लास्टिकचे आच्छादन व अन्य काही उपाययोजना केल्या जाणार आहेत. तूर्तास घाटातील दुहेरी वाहतूक अजूनही सुरू ठेवली आहे.
या भागातील धाेकादायक परिस्थिती पाहता येथे ‘व्हाया डक्ट’ पूल उभारण्याच्या हालचाली सुरू आहेत. त्यासाठी राष्ट्रीय महामार्ग विभागाने एजन्सीची नेमणूक करून आराखडा तयार करण्याचे काम साेपविले आहे. हा आराखडा येत्या काही महिन्यांत उपलब्ध हाेणार असल्याचे सांगण्यात आले आहे.
याबाबत राष्ट्रीय महामार्ग विभाग, पेणचे अधिकारी पंकज गोसावी यांनी सांगितले की, गॅबियन वॉलच्या मूळ बांधकामाला अजूनही धक्का बसलेला नाही. गॅबियन वाॅल अजूनही मजबूत असून, केवळ मातीचा भराव वाहून गेला आहे. घाटातील चौपदरीकरणाला कोणताही धोका नाही. त्यामुळे घाटातील दुहेरी वाहतूक सुरूच ठेवली आहे, असे त्यांनी सांगितले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
