देवरूख- संगमेश्वर तालुका हा विस्तीर्ण तालुका असून हा तालुका वनसंपदेने नटलेला तालुका आहे. या तालुक्यातील जंगलांमध्ये औषधी वनस्पती आहेत. काही औषधी वनस्पती आपल्याला माहिती नाहीत. परंतु त्यांचे औषधी गुणधर्म खूप मोठे आहेत. अशा औषधी व दुर्मिळ वनस्पतींची लागवड करून संगमेश्वर तालुका शेतकरी लाकूड व्यापारी संघटना व वनविभाग रत्नागिरी (चिपळूण) यांनी तालुक्यात स्तुत्य उपक्रम राबवला असल्याचे प्रतिपादन संगमेश्वर- चिपळूणचे आमदार शेखर निकम यांनी साडवली येथील पी. एस. बने इंटरनॅशनल स्कूल येथे आज रविवारी केले.
संगमेश्वर तालुका शेतकरी लाकूड व्यापारी संघटना व वनविभाग रत्नागिरी (चिपळूण) यांच्या संयुक्त विद्यमाने वनमहोत्सव कार्यक्रमाअंतर्गत रविवारी साडवली पी. एस. बने इंटरनॅशनल स्कूल परिसरात औषधी व दुर्मिळ प्रजाती वृक्षलागवडीचा कार्यक्रम मान्यवरांच्या उपस्थितीत उत्साहात संपन्न झाला. यावेळी ढोल ताशांच्या गजरात वृक्षदिंडी काढण्यात आली. या कार्यक्रमात प्रमुख पाहुणे म्हणून आ. शेखर निकम बोलताना पुढे म्हणाले कि, संगमेश्वर तालुका शेतकरी लाकूड व्यापारी संघटना व वनविभाग रत्नागिरी (चिपळूण) यांनी औषधी व दुर्मिळ प्रजाती वृक्षलागवडीचा आयोजित केलेला हा उपक्रम अतिशय स्तुत्य असून एकीकडे पर्यावरणाचा ऱ्हास होत असताना अशाप्रकारे वृक्षलागवड करणे काळाची गरज आहे. असा वृक्षलागवडीचा उपक्रम घेवून वनविभाग सामाजिक बांधिलकी जपण्याचे काम करत असून त्याला शेतकरी लाकूड व्यापारी संघटनेचे सहकार्य लाभत आहे. असेही आ. निकम म्हणाले.
रत्नागिरी-चिपळूणच्या विभागीय वनाधिकारी गिरिजा देसाई यांनी बोलताना म्हटले कि, वृक्ष अच्छादित क्षेत्रामध्ये अरूणाचल प्रदेशनंतर रत्नागिरी जिल्ह्याचा क्रमांक लागतो. ही आपल्यासाठी अभिमानाची गोष्ट आहे. वनविभाग आपल्यापरीने सामाजिक बांधिलकी जपण्याचे काम करत असून यापुढेही असेच उपक्रम वनविभागामार्फत घेतले जातील, असे श्रीमती देसाई यांनी सांगितले. माजी जि. प. अध्यक्ष रोहन बने यांनी बोलताना शेतकरी लाकूड व्यापारी संघटना व वनविभागाच्या या वृक्षलागवड उपक्रमाचे कौतुक केले. या कार्यक्रमप्रसंगी सभापती शर्वरी वेल्ये, उपसभापती प्रफुल्ल बाईत, पं. स. सदस्य मंगेश बांडागळे, देवरूखच्या नगराध्यक्षा सौ. मृणाल शेट्ये, उपनगराध्यक्ष वैभव पवार, माजी उपनगराध्यक्ष अभिजित शेट्ये, माजी सभापती बंड्या बोरूकर, सुरेश बने, बापू शिंदे, बाबा दामुष्टे, देवरूखचे वनपाल सागर गोसावी, सर्व वनरक्षक, शेतकरी लाकूड व्यापारी संघटनेचे संगमेश्वर तालुकाध्यक्ष किरण जाधव, पदाधिकारी व सर्व सदस्य उपस्थित होते. कार्यक्रमाचे प्रास्ताविक किरण जाधव यांनी केले तर सूत्रसंचालन विनोद निंबाळकर यांनी केले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
