लांजा तालुकातील वाकेड घाटात दरड कोसळली; वृद्ध ढिगाऱ्याखाली अडकल्याची भीती..

Spread the love

लांजा:- तालुक्यातील वाकेड घाट परिसरात सुरू असलेल्या नवीन पेट्रोल पंपाच्या बांधकामस्थळी शनिवारी पावसामुळे अचानक दरड कोसळल्याची शनिवारी 8.30 वाजण्याच्या सुमारास घटना घडली. या दुर्घटनेत एका वृद्ध व्यक्तीला दरडीखाली गाडले गेल्याची भीती व्यक्त करण्यात येत असून, त्याच्या सुटकेसाठी युद्धपातळीवर बचावकार्य सुरू करण्यात आले आहे.

मिळालेल्या माहितीनुसार, वाकेड बौद्धवाडीजवळ राष्ट्रीय महामार्गालगत मुंबई येथील श्रीकांत बोबडे यांच्या नवीन पेट्रोल पंपाचे बांधकाम सुरू आहे. कामाच्या ठिकाणी उभारण्यात आलेल्या तात्पुरत्या केबिनच्या शेजारी एक वृद्ध व्यक्ती पावसापासून बचाव करण्यासाठी थांबली होती. त्याचवेळी अचानक डोंगराचा काही भाग खचून मोठी दरड कोसळली आणि संबंधित व्यक्ती तिच्याखाली अडकल्याची माहिती आहे.

घटनेची माहिती मिळताच तहसीलदार प्रियांका ढोले, लांजा पोलीस ठाण्याचे पोलीस निरीक्षक निलकंठ बगळे यांच्यासह पोलीस पथक तातडीने घटनास्थळी दाखल झाले. तसेच जेसीबी यंत्र, लांजा आपत्कालीन व्यवस्थापन पथक आणि अन्य यंत्रणांना पाचारण करण्यात आले असून बचावकार्य सुरू आहे.

दरम्यान, घटनास्थळी काम करणारे तीन कामगार – जेद अतिकुल त्यागी (वय १८), सुवेल अयुब त्यागी (वय १९) आणि महंमद समीन साहवेज (वय २२) हे सुरक्षित असल्याची माहिती पोलिसांनी दिली आहे.

घटनेचे गांभीर्य लक्षात घेता वरिष्ठ अधिकाऱ्यांनाही याची माहिती देण्यात आली असून, दरडीखाली अडकलेल्या व्यक्तीचा शोध घेण्यासाठी आणि त्याची सुटका करण्यासाठी यंत्रणा प्रयत्नशील आहे. पुढील तपशील बचावकार्य पूर्ण झाल्यानंतर स्पष्ट होणार आहे.