कर्जत-पनवेल लोकल सेवा वर्षाअखेर सुरू होणार? स्थानकांच्या कामालाही आला वेग…

Spread the love

मुंबई रेल्वे विकास महामंडळ आणि मध्य रेल्वे यांच्या संयुक्त प्रकल्पातून हा सुमारे २९ किलोमीटर लांबीचा कर्जत-पनवेल नवीन मार्ग तयार केला जात आहे….

पनवेल/ नवी मुंबई/ प्रतिनिधी- कर्जत-पनवेल उपनगरी रेल्वे सेवेतील महत्त्वाच्या पनवेल स्थानकातील कामांनाही आता वेग आला आहे. स्थानकावर सध्या विस्तार, सुविधा उभारणी आणि प्रवासी व्यवस्थापन सुधारणा एकाचवेळी सुरू करण्यात आल्या आहेत. हा मार्ग सुरू होण्याची अधिकृत तारीख जाहीर नसली तरी या वर्षाच्या अखेरपर्यंत त्याची शक्यता आहे.

मुंबई रेल्वे विकास महामंडळ आणि मध्य रेल्वे यांच्या संयुक्त प्रकल्पातून हा सुमारे २९ किलोमीटर लांबीचा नवीन मार्ग साकारला जात आहे.

कर्जत, चौक, मोहोपाडा, रसायनी आणि पनवेल अशी स्थानके येथे प्रस्तावित आहेत. प्रकल्पातील बोगदे, पूल आणि ट्रॅकची कामे प्रगत टप्प्यात पोहोचली आहेत. पनवेलजवळील इंटरचेंज सुविधा आणि सिग्नलिंग कामे निर्णायक अवस्थेत पोहोचली आहेत.

पनवेल ठरणार महत्वाचे इंटरचेंज…

कर्जत लोकल सुरू झाल्यानंतर पनवेल हे महत्त्वाचे इंटरचेंज ठरणार आहे. त्यामुळे लोकल प्लॅटफॉर्मची लांबी वाढवली जात आहे. उंची सुधारली जात आहे. भविष्यातील १२ डब्यांच्या लोकलचा विचार करून नियोजन केले जात आहे.

प्रवाशांची वाढती गर्दी लक्षात घेऊन नवीन पादचारी पुलाचे कामही वेगात सुरू आहे. हा पूल नवीन प्रवाशांसाठी मोठा दिलासा ठरेल. पुलावर लिफ्ट, एस्कलेटरची सुविधा असणार आहे.

विमानतळाच्या पार्श्वभूमीवर महत्त्व..

नव्या मार्गिकेमुळे कर्जत परिसराला नवी मुंबईशी थेट उपनगरी संपर्क मिळणार आहे. आंतरराष्ट्रीय विमानतळ आणि वाढती लोकसंख्या लक्षात घेता हा मार्ग भविष्यातील महत्त्वाचा रेल्वे कॉरिडॉर ठरणार आहे.