*ठाणे-* शिवसेनेच्या जडणघडणीत मोलाची भूमिका बजावणारे ठाणे महानगरपालिकेचे शिवसेनेचे पहिले महापौर माजी खासदार सतीश प्रधान (वय ८४) यांचे आज रविवारी दुपारी २ वाजता वृद्धापकाळाने निधन झाले. सतीश प्रधान यांनी ठाणे शहराच्या विकासामध्ये तसेच शिवसेनेच्या संघटनात्मक मजबुतीसाठी मोठे योगदान दिले.
त्यांची अंत्ययात्रा सोमवारी सकाळी १० वाजता त्यांच्या निवासस्थानावरून निघणार आहे. सतीश प्रधान यांचा जन्म 29 ऑगस्ट 1940 रोजी झाला होता. शिवसेना प्रमुख बाळासाहेब ठाकरे यांचे विश्वासू म्हणून प्रधान यांची ओळख होती. ठाण्यात शिवसेना वाढवण्यात सतिश प्रधान यांचा मोठा वाटा होता. ठाणे नगरपालिकेचे पहिले नगराध्यक्ष होण्याचा मान सतीश प्रधान यांनाच मिळाला होती. शिवाय ठाणे महानगरपालिकेचे पहिले महापौर तेच झाले होते. राज्यसभेवर ते दोन वेळा निवडून गेले होते. त्यावेळी त्यांनी संसदेच्या विविध समित्यांवर काम केले होते. ठाण्याचे नगराध्यक्ष ते राज्यसभेचे खासदार असा त्यांचा राजकीय प्रवास राहीला आहे. ठाण्याच्या जडणघडणीमध्ये प्रधान यांनी महत्वाची भूमिका बजावली होती.
बाळासाहेबांचे विश्वासू म्हणून त्यांच्याकडे पाहिले जात होते. त्यांचा जन्म मध्य प्रदेशातील धार इथे झाला होता. पण त्यांची कर्मभूमी ही ठाणेच होती. ते संसदेत शिवसेनेचे गटनेते ही होते. काही दिवसांपासून सतीश प्रधान यांची तब्येत खालावली होती. त्यामुळे त्यांना रुग्णालयात दाखल करण्यात आले होते. परंतु उचचार सुरु असताना त्यांचे निधन झाले. त्यांनी ज्ञानसाधना महाविद्यालयाची १९८० साली स्थापन केले होती. माजी खासदार, ठाण्याचे पाहिले नगराध्यक्ष, पाहिले महापौर राहिले आहेत. ठाणे शहरात पहिली महापौर मॅरेथॉन सुरू केली. त्यांच्याकडे स्मार्ट सिटीची दूरदृष्टी होती.त्यांचे निधन म्हणजे ठाणे शहरासाठी तसेच शिवसेनेसाठी मोठी हानी आहे. सतीश प्रधान यांच्या पश्चात त्यांचा मुलगा कमलेश प्रधान, सून डॉ. मानसी प्रधान, कन्या, जावई आणि दोन नाती असा त्यांचा परिवार आहे. सतीश प्रधान यांच्या जाण्याने कुटुंबीयांमध्ये तसेच ठाण्याच्या सामाजिक आणि राजकीय क्षेत्रात मोठी पोकळी निर्माण झाली आहे.
