संगमेश्वर-दि. २० ऑगस्ट- संगमेश्वर उपकेंद्रातील पीटी (Potential Transformer) मध्ये बिघाड होऊन ब्लास्ट झाल्याने संगमेश्वर, देवरुख आणि साडवली उपकेंद्रांतून वीजपुरवठा होणाऱ्या विविध भागांचा विद्युत पुरवठा खंडित झाला. मध्यरात्रीच्या सुमारास अचानक निर्माण झालेल्या या तांत्रिक बिघाडामुळे नागरिकांची मोठी गैरसोय झाली.
घटनेची माहिती मिळताच संगमेश्वर सेक्शनमधील वरिष्ठ तंत्रज्ञ कळंबटे आणि रमेश कदम यांनी परिस्थितीचे गांभीर्य ओळखून मध्यरात्री तातडीने सबस्टेशनमध्ये धाव घेतली. वीजपुरवठा शक्य तितक्या लवकर पूर्ववत करण्यासाठी त्यांनी आपत्कालीन परिस्थितीत महत्त्वपूर्ण तांत्रिक कार्यवाही केली.
यावेळी सबस्टेशनमधील सुरक्षा कर्मचारी चिमणे यांनीही आवश्यक ते सहकार्य केले. त्यांच्या समन्वयातून आणि अथक प्रयत्नांमुळे रात्रीच्या वेळीच संगमेश्वर, देवरुख आणि साडवली सबस्टेशनचा वीजपुरवठा पुन्हा सुरू करण्यात यश आले.
या संपूर्ण कार्यवाहीस संगमेश्वरचे उपकार्यकारी अभियंता कौरवार यांचे विशेष मार्गदर्शन लाभले. मध्यरात्रीची वेळ असतानाही नागरिकांची गैरसोय लक्षात घेऊन महावितरणच्या कर्मचाऱ्यांनी तातडीने घटनास्थळी धाव घेत वीजपुरवठा पूर्ववत करण्यासाठी केलेल्या प्रयत्नांचे नागरिकांकडून कौतुक होत आहे.
*अचानक उद्भवलेल्या तांत्रिक बिघाडावर प्रतिकूल परिस्थितीत तत्परतेने कार्यवाही करत वीजपुरवठा सुरळीत करणाऱ्या कळंबटे, रमेश कदम, चिमणे तसेच उपकार्यकारी अभियंता कौरवार यांचे मनःपूर्वक अभिनंदन करण्यात येत आहे. त्यांच्या कर्तव्यनिष्ठेमुळे मध्यरात्रीच्या वेळी नागरिकांना मोठा दिलासा मिळाला.*
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
