सावर्डे, प्रतिनिधी : राष्ट्रवादी काँग्रेस पार्टीच्या वतीने लोकनेते स्वर्गीय अजितदादा यांच्या जयंतीनिमित्त सावर्डे येथील जनसंपर्क कार्यालयात विविध सामाजिक उपक्रमांचे आयोजन करण्यात आले. चिपळूण-संगमेश्वरचे आमदार शेखर निकम यांच्या मार्गदर्शनाखाली झालेल्या या कार्यक्रमात वृक्षारोपण, विद्यार्थ्यांना रोपवाटप तसेच स्वर्गीय अजितदादा यांच्या कार्याला अभिवादन करण्यात आले.
कार्यक्रमाच्या प्रारंभी स्वर्गीय अजितदादा यांच्या प्रतिमेस पुष्पहार अर्पण करून अभिवादन करण्यात आले. त्यानंतर उपस्थित मान्यवर, राष्ट्रवादी काँग्रेसचे पदाधिकारी, कार्यकर्ते आणि विद्यार्थ्यांनी पुष्पांजली अर्पण केली. यावेळी ग्रामीण विकास, शिक्षण आणि सामाजिक बांधिलकीच्या क्षेत्रातील त्यांच्या योगदानाचे स्मरण करण्यात आले.
जयंतीनिमित्त लायन्स क्लब, सावर्डे यांच्या वतीने शालेय विद्यार्थ्यांना विविध वृक्षांची रोपे वाटप करण्यात आली. प्रत्येक विद्यार्थ्याने लावलेल्या रोपांची नियमित जोपासना करून पर्यावरण संवर्धनात योगदान द्यावे, असे आवाहन यावेळी करण्यात आले.
यानंतर राष्ट्रीय महामार्गाच्या दुभाजकात वृक्षारोपणाचा उपक्रम उत्साहात पार पडला. उपस्थित मान्यवर, पदाधिकारी, कार्यकर्ते आणि विद्यार्थ्यांनी प्रत्यक्ष सहभाग घेत विविध वृक्षांची लागवड केली. पर्यावरणाचा समतोल राखण्यासाठी वृक्षारोपण आणि वृक्षसंवर्धन ही काळाची गरज असल्याचे यावेळी वक्त्यांनी सांगितले.
आमदार शेखर निकम यांच्या मार्गदर्शनाखाली आयोजित या कार्यक्रमातून सामाजिक बांधिलकी आणि पर्यावरण संवर्धनाचा संदेश देण्यात आला. विधायक उपक्रमांद्वारे समाजहिताचे कार्य सातत्याने सुरू ठेवण्याचा निर्धारही यावेळी व्यक्त करण्यात आला.
कार्यक्रमास पंचायत समिती सदस्य शौकतभाई माखजनकर, सरपंच (प्रशासक) समीक्षा बागवे, माजी सरपंच सुभाष मोहिरे, माजी जिल्हा परिषद सदस्या युगंधरा राजेशिर्के, संस्थेचे उपाध्यक्ष प्रशांत निकम, बाबुशेठ चव्हाण, देवराज गरगटे, जमीर मुल्लाजी, सचिन कोल्हापुरे, अशोक काजरोळकर, प्रदीप निकम, प्राचार्य सुनीतकुमार पाटील, प्राचार्य उमेश लकेश्री, सई निकम-सुर्वे, सरिता कोल्हापुरे, विनायक सावंत यांच्यासह राष्ट्रवादी काँग्रेस पार्टीचे पदाधिकारी, महिला व युवक कार्यकर्ते, ग्रामस्थ आणि विद्यार्थी मोठ्या संख्येने उपस्थित होते.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
