ग्रामीण शिक्षणाला ‘डिजिटल’ झळाळी! आमदार शेखर निकम यांच्या पुढाकारातून ५० अंगणवाड्या आणि १० जिल्हा परिषद शाळा होणार हायटेक!..

व्हीआर लॅब, ५५ इंची इंटरॲक्टिव्ह पॅनेल अन् ३डी ए.आय. तंत्रज्ञानाचा समावेश; अंगणवाडींसाठी ९० लाखांचा विशेष निधी…

चिपळूण : ग्रामीण भागातील विद्यार्थ्यांनाही आधुनिक तंत्रज्ञानाच्या माध्यमातून दर्जेदार शिक्षण मिळावे, या उद्देशाने चिपळूण-संगमेश्वर विधानसभा मतदारसंघात महत्त्वपूर्ण पाऊल उचलण्यात आले आहे. आमदार शेखरजी गोविंद निकम यांच्या विशेष प्रयत्नांतून ५० अंगणवाडी केंद्रे आणि १० जिल्हा परिषद शाळांमध्ये आधुनिक डिजिटल शिक्षण सुविधा उपलब्ध करून देण्याचा महत्त्वाकांक्षी उपक्रम सुरू झाला आहे. Clean India Technology आणि Teach Know Pvt. Ltd. यांच्या संयुक्त सहकार्याने राबविण्यात येणाऱ्या या उपक्रमामुळे ग्रामीण शिक्षणव्यवस्थेला तंत्रज्ञानाची नवी जोड मिळणार आहे.

शाळांमध्ये व्हर्च्युअल रिॲलिटीचा अनुभव!…

पुस्तकी ज्ञानासोबत प्रत्यक्ष अनुभवातून शिक्षण घेण्याची संधी विद्यार्थ्यांना मिळावी, यासाठी जिल्हा परिषद शाळांमध्ये अत्याधुनिक व्हर्च्युअल रिॲलिटी (VR) लॅब, ५५ इंची इंटरॲक्टिव्ह डिजिटल पॅनेल आणि बालभारती अभ्यासक्रमावर आधारित ई-लर्निंग सॉफ्टवेअर उपलब्ध करून देण्यात आले आहे. या तंत्रज्ञानामुळे विज्ञानासह विविध विषयांतील कठीण संकल्पना आभासी अनुभवातून समजून घेणे विद्यार्थ्यांना अधिक सोपे आणि रंजक होणार आहे.

चिमुकल्यांसाठी ३डी ए.आय. शिक्षण!…

अंगणवाडीतील बालकांचे शिक्षण अधिक आनंददायी आणि कृतीशील बनविण्यासाठी ३डी ए.आय. अंगणवाडी आणि इंटरॲक्टिव्ह एज्युकेशनल मॅट यांसारख्या आधुनिक शैक्षणिक प्रणालींचा समावेश करण्यात आला आहे. यामुळे खेळ, चित्रे आणि परस्परसंवादी उपक्रमांच्या माध्यमातून बालकांच्या शिकण्याच्या प्रक्रियेला चालना मिळण्यास मदत होणार आहे.

या ५० अंगणवाडी केंद्रांसाठी कोयना भूकंप विकास समितीमार्फत ९० लाख रुपयांचा विशेष निधी उपलब्ध करून देण्यात आला आहे. या निधीतून अँड्रॉइड प्रणाली, वेब कॅमेरा, वायरलेस कीबोर्ड-माउस, ३०३ शैक्षणिक कार्डे आणि पूरक सॉफ्टवेअर अशी शैक्षणिक सामग्री पुरविण्यात आली आहे.

मान्यवरांच्या उपस्थितीत उपक्रमाचा शुभारंभ…

या प्रकल्पाचा औपचारिक शुभारंभ नुकताच मान्यवरांच्या उपस्थितीत पार पडला. यावेळी प्रातिनिधिक स्वरूपात पाच अंगणवाडी सेविकांना आमदार शेखर निकम आणि उपस्थित मान्यवरांच्या हस्ते शैक्षणिक साहित्याचे वितरण करण्यात आले. या प्रकल्पाच्या अंमलबजावणीची जबाबदारी सातारा येथील स्टार एज्युस मार्ट आणि क्लीन इंडिया संस्था सांभाळत आहेत.

उपस्थित मान्यवरांची लक्षणीय उपस्थिती…

या कार्यक्रमाला आमदार शेखरजी निकम, जिल्हा परिषद सदस्या पूजा निकम, तालुकाध्यक्ष नितीन ठसाळे, प्रदेश सरचिटणीस जयंत खताते, जिल्हा परिषद सदस्य संजय कदम, सुशील भाईजे, संगमेश्वर पंचायत समितीचे उपसभापती प्रफुल्ल बाईक, पंचायत समिती सदस्य शौकत माखजनकर, शरद शिगवण, मनस्वी बैकर, इंगवले, सुवरे, साळवी, गव्हाळी, जिल्हा नियोजन समितीचे सदस्य विजय गुजर, ज्येष्ठ नेते अशोकराव कदम, दशरथ दाभोळकर आणि गणपत कदम यांच्यासह विविध मान्यवर उपस्थित होते.

प्रशासकीय स्तरावर चिपळूणचे गटशिक्षणाधिकारी इर्नाक, विस्तार अधिकारी देसाई, संगमेश्वरचे गटशिक्षणाधिकारी परीक्षा, महिला व बालकल्याण अधिकारी शिगवण, दिशा दाभोळकर, आदिती देशपांडे यांच्यासह सरपंच, ग्रामपंचायत सदस्य, प्रशासक, अंगणवाडी सेविका, शिक्षक, शिक्षकेतर कर्मचारी आणि ग्रामस्थांनी उपस्थिती दर्शविली.

कार्यक्रमाचे सूत्रसंचालन राष्ट्रवादी काँग्रेस पार्टीच्या सांस्कृतिक विभागाचे जिल्हाध्यक्ष देवराज गरगटे यांनी केले, तर आभार जिल्हा परिषद सदस्य संजय कदम यांनी मानले.

डिजिटल शिक्षणातून ग्रामीण विद्यार्थ्यांना नवी संधी..

ग्रामीण भागातील विद्यार्थ्यांना आधुनिक शैक्षणिक साधनांचा परिचय करून देणारा हा उपक्रम महत्त्वपूर्ण ठरण्याची अपेक्षा आहे. अंगणवाडीपासून प्राथमिक शिक्षणापर्यंत तंत्रज्ञानाधारित अध्ययनाची सुविधा उपलब्ध झाल्यामुळे विद्यार्थ्यांमध्ये जिज्ञासा, सहभाग आणि संकल्पना समजून घेण्याची क्षमता विकसित करण्यास मदत होऊ शकते. या उपक्रमाची प्रभावी अंमलबजावणी आणि सातत्यपूर्ण वापर झाल्यास ग्रामीण शिक्षणाच्या गुणवत्तेला नवी दिशा मिळू शकते.

🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥

🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर