मंगला लक्षद्वीप एक्स्प्रेसच्या महिला राखीव डब्यातील हुल्लडबाजांवर खेड येथे धडक कारवाई; आरपीएफने आरोपींना ताब्यात घेतले…

Spread the love

रोहा स्थानक पार केल्यानंतर जनसंपर्क अधिकारी सचिन देसाई यांच्या तत्परतेमुळे खेड रेल्वे स्थानकावर पोलिसांनी डब्याला घातला वेढा.

रत्नागिरी : मंगला लक्षद्वीप एक्स्प्रेसच्या महिला राखीव डब्यात बेकायदेशीरपणे प्रवेश करून सिगारेट ओढणे, गुटखा खाणे आणि महिला प्रवाशांना त्रास देणाऱ्या हुल्लडबाज तरुणांविरोधात कोकण रेल्वे प्रशासनाने तातडीने धडक कारवाई केली. खेड रेल्वे स्थानकावर रेल्वे सुरक्षा बलाच्या मदतीने संबंधित तरुणांना डब्यातून बाहेर काढून त्यांच्यावर रेल्वे कायद्यानुसार कारवाई करण्यात आली.

महिला प्रवाशांच्या सुरक्षेशी संबंधित हा संतापजनक प्रकार समोर आल्यानंतर रविवारी सकाळी साडेआठच्या सुमारास याबाबतची माहिती प्रसारित झाली. त्यानंतर कोकण रेल्वेचे जनसंपर्क अधिकारी सचिन देसाई यांनी तातडीने दखल घेत संबंधित यंत्रणेशी संपर्क साधला. ट्रेन रोहा स्थानक सोडून पुढे गेल्याने पुढील प्रमुख स्थानक असलेल्या खेड येथे कारवाईची आखणी करण्यात आली.

गाडी क्रमांक १२६१८ एर्नाकुलम–हजरत निजामुद्दीन मंगला लक्षद्वीप एक्स्प्रेस खेड स्थानकात दाखल होताच आधीपासून तैनात असलेल्या रेल्वे पोलीसांच्या पथकाने महिला डब्यावर धडक कारवाई केली. पोलिसांना पाहताच डब्यातील काही प्रवाशांनी पळून जाण्याचा प्रयत्न केला. मात्र, रेल्वे पोलिसांनी डब्याला वेढा घालून बेकायदेशीरपणे महिला डब्यात प्रवास करणाऱ्या आणि महिला प्रवाशांना त्रास देणाऱ्या सर्व संबंधितांना ताब्यात घेतले.

प्राथमिक माहितीनुसार, काही तरुण महिला डब्यात सिगारेट ओढत होते तसेच गुटखा खाऊन धूर व दुर्गंधीमुळे महिला प्रवाशांना मोठा त्रास सहन करावा लागत होता. यामुळे महिला प्रवाशांमध्ये भीती आणि संतापाचे वातावरण निर्माण झाले होते. याची गंभीर दखल घेत कोकण रेल्वे प्रशासनाने त्वरित कारवाईचे आदेश दिले.रेल्वे सुरक्षा बलाने संबंधित आरोपींविरोधात रेल्वे कायद्यानुसार गुन्हे नोंदवून पुढील प्रक्रिया सुरू केली आहे. कारवाईनंतर महिला प्रवाशांनी सुटकेचा श्वास घेत रेल्वे प्रशासन आणि रेल्वे पोलीसांचे आभार मानले.

महिला प्रवाशांच्या सुरक्षिततेबाबत कोणतीही तडजोड केली जाणार नाही, असा स्पष्ट संदेश या कारवाईतून देण्यात आला आहे. कोकण रेल्वे प्रशासनाच्या तत्परतेमुळे आणि रेल्वे सुरक्षा बलाच्या वेळेवर झालेल्या कारवाईमुळे संभाव्य अनुचित प्रकार टळला असून महिला राखीव डब्यांमध्ये नियमांचे काटेकोर पालन करण्यासाठी अशा प्रकारच्या कारवाया पुढेही सुरू राहतील, असे संकेत या घटनेतून मिळाले आहेत. महिला डब्यात हुल्लडबाजी करणा-या या तरुणांवर कारवाई करणा-या रेल्वे पोलिसांचे आणि तात्काळ दखल घेणारे रेल्वेचे जनसंपर्क अधिकारी सचिन देसाई यांचे कौतूक करण्यात येत आहे.