पदकांची लयलूट करत खेळाडूंची जिल्हास्तरीय स्पर्धेसाठी दिमाखात निवड…
*सावर्डे, प्रतिनिधी :* तालुकास्तरीय मैदानी क्रीडा स्पर्धेत सावर्डे येथील गोविंदराव निकम माध्यमिक व उच्च माध्यमिक विद्यालयाच्या खेळाडूंनी आपल्या उत्कृष्ट कामगिरीच्या जोरावर पदकांची अक्षरशः लयलूट केली. धावणे, लांब उडी, तिहेरी उडी, गोळाफेक, थाळीफेक, भालाफेक, हर्डल्स आणि रिले अशा विविध क्रीडा प्रकारांत विद्यार्थ्यांनी उल्लेखनीय यश मिळवले. या दमदार कामगिरीमुळे विद्यालयाच्या अनेक खेळाडूंची आगामी जिल्हास्तरीय मैदानी स्पर्धेसाठी निवड झाली आहे.
क्रीडा व युवक सेवा संचालनालय, महाराष्ट्र राज्य, पुणे आणि रत्नागिरी जिल्हा क्रीडा कार्यालय यांच्या संयुक्त विद्यमाने एस. व्ही. जे. सी. टी. डेरवण येथे या स्पर्धेचे आयोजन करण्यात आले होते. स्पर्धेत १४ व १९ वर्षांखालील मुला-मुलींनी विविध क्रीडा प्रकारांत आपले कौशल्य सिद्ध केले.
*१४ वर्षांखालील गटात सुवर्णपदकांची कमाई..*
मुलांच्या गटात रुद्र खापरे याने २०० मीटर धावण्याच्या स्पर्धेत सुवर्णपदक पटकावले. आर्यन घाणेकर याने ६०० मीटर धावणे आणि गोळाफेक प्रकारांत कांस्यपदक मिळवले. मुलांच्या ४×१०० मीटर रिले संघाने प्रथम क्रमांक मिळवत मैदानावर आपली छाप पाडली.
मुलींच्या गटात कस्तुरी घाग हिने २०० व ४०० मीटर धावण्याच्या दोन्ही स्पर्धांत सुवर्णपदके जिंकून दुहेरी यश संपादन केले. स्वरा राणीम हिने ६०० मीटर धावण्यात, तर स्वरा धावडे हिने गोळाफेक प्रकारात सुवर्णपदक मिळवले. अर्णवी चव्हाण हिने २०० मीटर, तर आदिती पाष्टे हिने १०० मीटर धावण्यात तृतीय क्रमांक मिळवला. मुलींच्या ४×१०० मीटर रिले संघानेही प्रथम क्रमांक पटकावला.
*प्रांजल हुमणेची सुवर्णपदकांची हॅटट्रिक*
१९ वर्षांखालील मुलींच्या गटात प्रांजल हुमणे हिने १०० मीटर धावणे, लांब उडी आणि तिहेरी उडी या तिन्ही प्रकारांत सुवर्णपदके मिळवून लक्षवेधी कामगिरी केली. सृष्टी खेराडे हिने गोळाफेक, थाळीफेक आणि भालाफेक या तिन्ही प्रकारांत सुवर्णपदके जिंकत आपले वर्चस्व सिद्ध केले.
रुद्रा हुमणे हिने ४०० मीटर धावण्यात सुवर्ण, तर ११० मीटर हर्डल्समध्ये रौप्यपदक पटकावले. श्रावणी हुमणे हिने गोळाफेक व भालाफेक प्रकारांत कांस्यपदके मिळवली. मुलींच्या ४×४०० मीटर रिले संघाने प्रथम, तर ४×१०० मीटर रिले संघाने द्वितीय क्रमांक मिळवला.
*सागर शर्माची तिहेरी सुवर्णकामगिरी..*
१९ वर्षांखालील मुलांच्या गटात सागर शर्मा याने १५०० मीटर, ३००० मीटर आणि ५ किलोमीटर क्रॉस-कंट्री या तीन शर्यतींत सुवर्णपदके जिंकून विशेष कामगिरी नोंदवली. पृथ्वी राजभर याने ८०० व १५०० मीटर धावण्यात द्वितीय, तर ५ किलोमीटर क्रॉस-कंट्रीमध्ये तृतीय क्रमांक मिळवला. श्रवण आग्रे याने ३००० मीटर धावण्यात द्वितीय क्रमांक पटकावला.
अजिंक्य भायजे याने थाळीफेकमध्ये सुवर्ण व गोळाफेकमध्ये कांस्यपदक मिळवले. विघ्नेश घाणेकर याने ४०० मीटर धावण्याच्या स्पर्धेत कांस्यपदक पटकावत विद्यालयाच्या यशात भर घातली.
*क्रीडाशिक्षकांच्या मार्गदर्शनाला यशाची पावती*
या सर्व खेळाडूंना क्रीडाशिक्षक दादासाहेब पांढरे, रोहित गमरे, अमृत कडगावे आणि प्रशांत सकपाळ यांचे मार्गदर्शन लाभले. त्यांच्या प्रशिक्षणामुळे विद्यार्थ्यांना विविध क्रीडा प्रकारांत उल्लेखनीय कामगिरी करता आली.
विद्यालयाच्या या उज्ज्वल यशाबद्दल सह्याद्री शिक्षण संस्थेचे अध्यक्ष व आमदार शेखरजी निकम, उपाध्यक्ष प्रशांतशेठ निकम, युगंधरा राजेशिर्के, डॉ. इसाक खतीब, कार्याध्यक्ष अनिरुद्ध निकम, सचिव महेश महाडिक, विश्वस्त व शालेय समितीचे चेअरमन शांताराम खानविलकर, सर्व पदाधिकारी व शालेय समिती सदस्य यांनी खेळाडूंचे अभिनंदन केले.
विद्यालयाचे मुख्याध्यापक राजेंद्रकुमार वारे, उपमुख्याध्यापक विजय चव्हाण आणि पर्यवेक्षक महेश कुलकर्णी यांनीही खेळाडू व क्रीडाशिक्षकांचे विशेष कौतुक केले. आगामी जिल्हास्तरीय स्पर्धेतही खेळाडूंनी अशीच चमकदार कामगिरी करून विद्यालयाचा नावलौकिक वाढवावा, अशा शुभेच्छा यावेळी देण्यात आल्या.
**सावर्डेच्या क्रीडापटूंनी तालुकास्तरावर गाजवलेला हा डंका म्हणजे मेहनत, जिद्द आणि योग्य मार्गदर्शनाच्या जोरावर मिळवलेल्या यशाचे उत्तम उदाहरण ठरले आहे. आता जिल्हास्तरीय स्पर्धेतही या खेळाडूंच्या कामगिरीकडे क्रीडाप्रेमींचे लक्ष लागले आहे.*
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
