एकनाथ शिंदे रुसले, आता दादाही अडून बसले; दिल्लीत तळ ठोकला, शहांना भेटणार; मागण्यांची जंत्री समोर?..

Spread the love

नवी दिल्ली- महाराष्ट्राचे काळजीवाहू मुख्यमंत्री एकनाथ शिंदे प्रकृतीच्या कारणास्तव सत्ता स्थापनेच्या बैठकांपासून लांब आहेत. त्यामुळे सत्ता स्थापनेचा पेच कायम आहे. दुसरीकडे माजी उपमुख्यमंत्री आणि राष्ट्रवादी काँग्रेसचे अध्यक्ष अजित पवार २४ तासांपासून दिल्लीत तळ ठोकून आहेत. केंद्रीय गृहमंत्री अमित शहांच्या भेटीसाठी अजित पवार दिल्लीत आहेत. काही वेळातच त्यांची शहांसोबत भेट होऊ शकेल. अजित पवारांसोबत पक्षाचे कार्यकारी अध्यक्ष प्रफुल पटेल आणि प्रदेशाध्यक्ष सुनील तटकरेदेखील दिल्लीत आहेत.

प्रकृतीच्या कारणास्तव शिंदेंनी त्यांच्या सगळ्या गाठीभेटी रद्द केल्या आहेत. त्यामुळे महायुतीच्या सत्ता स्थापनेच्या बैठकाच होत नसल्याचं चित्र आहे. मुख्यमंत्रिपदावरील दावा सोडणाऱ्या शिंदेंनी उपमुख्यमंत्रिपदासह गृह मंत्रालयाची मागणी केली आहे. पण भाजपनं त्यांना सकारात्मक प्रतिसाद दिलेला नाही. भाजप गृह विभाग सोडायला तयार नाही. त्यामुळे शिंदे नाराज असल्याची चर्चा आहे. शिंदे बार्गेनिंग पॉवर वाढवत असताना दुसरीकडे अजित पवार अधिकच्या मंत्रिपदांची मागणी करत आहेत.

राष्ट्रवादी काँग्रेसला महायुतीच्या नव्या सरकारमध्ये ११ मंत्रिपदं मिळावीत, अशी अजित पवारांची मागणी आहे. याशिवाय राष्ट्रवादीला केंद्रात १ कॅबिनेट मंत्रिपद हवं आहे. ही मागणी मान्य झाल्यास प्रफुल पटेल केंद्रात मंत्री होतील. राज्यसभेचे खासदार असलेल्या पटेल यांनी यूपीए सरकारमध्ये नागरी उड्डाण मंत्री म्हणून काम केलं आहे. केंद्रात ६ महिन्यांपूर्वी एनडीएचं सरकार आलं. त्यावेळी भाजपनं राष्ट्रवादीला राज्यमंत्रिपदाची ऑफर दिलेली होती. पण ती नाकारण्यात आली. पटेल यांनी आधी कॅबिनेट मंत्री म्हणून काम केल्यानं राष्ट्रवादीनं राज्यमंत्रिपद स्वीकारण्यास नकार दिला. मंत्रिमंडळात अधिकाधिक तरुण चेहऱ्यांना संधी देण्याचा मानस अजित पवारांनी काही दिवसांपूर्वीच बोलून दाखवला आहे. तरुणांना जास्त संधी द्यायची असल्यास ज्येष्ठांची सोय करण्याचं आव्हान अजित पवारांसमोर आहे. त्यासाठीच ते राज्यपालपदासाठीही आग्रही आहेत. राष्ट्रवादी काँग्रेसला १ राज्यपालपद द्यावं, अशी त्यांची मागणी आहे. या सगळ्या मागण्या घेऊन अजित पवार भाजपचे वरिष्ठ नेते अमित शहांना भेटणार आहेत.

Author


Spread the love

Leave a Reply

Your email address will not be published. Required fields are marked *

You cannot copy content of this page