मंडणगड बसस्थानकाच्या नव्या इमारतीमुळे प्रवाशांची गैरसोय दूर होणार…

Spread the love

५ कोटींच्या निधीतून अद्ययावत इमारत; तात्पुरत्या प्रवासी शेडचे लोकार्पण

*मंडणगड :* मंडणगड शहराच्या मध्यवर्ती भागात सर्व सोयीसुविधांनी युक्त नवीन बसस्थानकाची इमारत उभारण्यात येणार असून, या कामासाठी ५ कोटी रुपयांचा निधी मंजूर करण्यात आला आहे. नवीन बसस्थानकाच्या इमारतीचे भूमिपूजन तसेच तात्पुरत्या प्रवासी शेडचे लोकार्पण गृहराज्यमंत्री योगेश कदम यांच्या हस्ते गुरुवारी करण्यात आले. या नवीन इमारतीमुळे मंडणगड तालुक्यातील नागरिक आणि प्रवाशांची प्रदीर्घ काळापासूनची गैरसोय कायमस्वरूपी दूर होईल, असा विश्वास योगेश कदम यांनी व्यक्त केला.

भूमिपूजनानंतर आयोजित कार्यक्रमात बोलताना कदम म्हणाले की, समस्यांवर केवळ तात्पुरती मलमपट्टी न करता कायमस्वरूपी आणि दीर्घकालीन उपाययोजना करण्यावर आपला भर आहे. मंडणगड बसस्थानकाची जुनी इमारत पाडून अत्याधुनिक सुविधा असलेली नवीन इमारत उभारण्यासाठी सातत्याने पाठपुरावा करण्यात आला. नवीन इमारतीमुळे स्वच्छतागृहांसह प्रवाशांना आवश्यक सुविधा उपलब्ध होतील, तसेच बसस्थानक परिसराचे सुशोभीकरणही करण्यात येईल.

महिलांच्या बचत गटांसाठी मॉल, ई-बससाठी चार्जिंग स्टेशन

बसस्थानक परिसरातील महिला बचत गटांना रोजगाराच्या संधी उपलब्ध व्हाव्यात, यासाठी स्वतंत्र मॉल उभारण्याचा प्रस्ताव तयार करण्याचे निर्देश कदम यांनी प्रशासनाला दिले. तसेच जुन्या आणि नादुरुस्त बसेस बदलून आगाराच्या मागणीनुसार नवीन बसेस उपलब्ध करून देण्याची ग्वाही त्यांनी दिली. भविष्यात इलेक्ट्रिक बसेस सुरू होणार असल्याने बसस्थानक परिसरात चार्जिंग स्टेशनसाठी तातडीने जागा निश्चित करण्याच्या सूचनाही त्यांनी दिल्या.

मंडणगडला २४ तास पाणीपुरवठ्याचे आश्वासन

मंडणगड नगरपंचायतीच्या पाणीप्रश्नावरही कदम यांनी भाष्य केले. नगरपंचायतीच्या पाणी योजनेसाठी निधी मंजूर झाला असून, तांत्रिक अडचणी दूर करून काम जलदगतीने सुरू केले जाईल. शहरातील प्रत्येक घराला २४ तास पाणीपुरवठा उपलब्ध करून देण्यासाठी आपण कटिबद्ध असल्याचे त्यांनी स्पष्ट केले.

या कार्यक्रमाला जिल्हा परिषद अध्यक्षा अस्मिता केंद्रे, मंडणगड पंचायत समितीच्या सभापती प्रणाली चिले, नगराध्यक्ष सोनल बेर्डे, जिल्हा परिषद सदस्य प्रताप घोसाळकर, उपसभापती दीपक मालुसरे, पंचायत समिती सदस्य अनिल रटाटे, दीप्ती घडशी, शशिकांत चव्हाण, तहसीलदार अक्षय ढाकणे, आगारप्रमुख मदनीपाशा जुनेदी, माजी सभापती अनंत लाखण, रामदास रेवाळे, विनोद जाधव, दीपक घोसाळकर यांच्यासह विविध विभागांचे अधिकारी, स्थानिक पदाधिकारी आणि नागरिक मोठ्या संख्येने उपस्थित होते.