गटनेता निवडीच्या बैठकीत बावनकुळे देवेंद्र फडणवीसांचं नाव विसरले; नेमकं काय घडलं?
मुंबई /प्रतिनिधी- महाराष्ट्रात सत्ता स्थापनेच्या हालचालींना वेग आला आहे. विधिमंडळात आज भाजपच्या गट नेता निवडीची प्रक्रिया पार पडली. यावेळी भाजपच्या निरीक्षक निर्मला सीतारमण यांच्या उपस्थितीत ही गटनेता निवडीची प्रक्रिया पार पडली. यावेळी भाजपचे प्रदेशाध्यक्ष चंद्रशेखर बावनकुळे यांनी उपस्थितांना संबोधित केलं. यावेळी बोलताना मंचावरील सगळ्यांचा उल्लेख चंद्रशेखर बावनकुळे यांनी केला. मात्र देवेंद्र फडणवीस यांचं नाव घ्यायला बावनकुळे विसरले.
मी आधीच सांगितलं हा ऐतिहासिक दिवस आहे. माफ करा मी आपले नेते देवेंद्र फडणवीस यांचा उल्लेख करायचं राहून गेलं. फडणवीस उपस्थित आहेत. खाली असल्यामुळे राहून गेलं. आपल्या सर्वांसाठी आनंदाचा दिवस आहे. ऐतिहासिक विजय आपल्याला मिळाला. आपल्या लाखो कार्यकर्त्यांनी, भाजपच्या पदाधिकाऱ्यांनी, कार्यकर्त्यांनी, भाजपचे आपण सर्व उमेदवार होतो. आता आमदार आहोत. तुम्ही सर्वांनी मोदींच्या मार्गदर्शनात आणि फडणवीस यांच्या नेतृत्वात आपण ऐतिहासिक महाविजय व्हावा यासाठी प्रचंड ताकद लावली. प्रचंड मेहनत केली. मोदींच्या नेतृत्वात आपण डबल इंजिन सरकार पुढे नेऊ शकतो, महाराष्ट्र हे देशातील सर्वोत्तम राज्य होऊ शकतं. हे जनता आणि मतदारांपर्यंत पोहोचवण्याचं काम केलं. जनतेने आपल्याला भरभरून यश दिलं. प्रचंड यश दिले, असं बावनकुळे म्हणाले.
