राजकोट किल्ल्यावर उभारलेला छत्रपती शिवाजी महाराजांचा पुतळा कोसळल्यानंतर आता नवीन माहिती समोर आली आहे. पुतळ्याचे नटबोल्ट गंजले असल्याचं पत्र नौदलाला देण्यात आल्याचं समोर आलं आहे.
सिंधुदुर्ग : नौदलदिनाच्या निमित्ताने कोकणात सिंधुदुर्ग जिल्ह्यात मालवण येथील राजकोट किल्ल्यावर उभारण्यात आलेला श्री शिवछत्रपतींचा पुतळा सोमवारी दुपारी कोसळल्याने मोठी खळबळ उडली. याबाबत शिवप्रेमींकडून संताप व्यक्त होत आहे. मात्र आता या प्रकरणात आणखी एक नवा ट्विस्ट समोर आला आहे.
पुतळ्यासाठी वापरलेले नटबोल्ट गंजल्याचं दिलेलं पत्र…
मालवणच्या सार्वजनिक बांधकाम विभागाने नौदलाला याविषयी २० ऑगस्ट रोजीच लेखी पत्र पाठवून या पुतळ्यासाठी वापरले गेलेले नटबोल्ट गंजले असल्याची स्पष्ट कल्पना लेखी पत्राद्वारे दिली होती अशी धक्कादायक माहिती आता समोर आली आहे. मात्र शासनाच्या सार्वजनिक बांधकाम विभागाने हे पत्र देऊन आपली सुटका करून घेतली आहे का? असाही प्रश्न आता या निमित्ताने उपस्थित होत आहे.
नौदलाचे कमांडर अभिषेक कारभारी यांना २० ऑगस्ट रोजी मालवण येथील सार्वजनिक बांधकाम विभागाच्या सहाय्यक अभियंत्यांनी लेखी पत्र पाठवून यासंबंधी कळवल्याची माहिती आता समोर आली आहे.
जून महिन्यात पुतळ्याची डागडुजी…
४ डिसेंबर २०२३ रोजी नौसेना दिनानिमित्त मालवण तालुक्यातील राजकोट किल्ल्याचे बांधकाम करण्यात आलं होतं. त्यानंतर छत्रपती शिवाजी महाराजांचा पुतळा उभारण्यात आला होता. जून महिन्यामध्ये छत्रपती शिवाजी महाराजांच्या पुतळ्याचे शिल्पकार जयदीप आपटे यांच्याकडून छत्रपती शिवाजी महाराजांच्या पुतळ्याची डागडुजी करण्यात आली होती.
परंतु सद्यस्थितीत पुतळ्याचे जॉईंट करण्यासाठी आपण नटबोल्टचा वापर केला होता, त्या नटबोल्टला आता पावसामुळे आणि समुद्र किनाऱ्यावरील खारे वारे यामुळे गंज पकडला आहे, अशी स्पष्टपणे लेखी माहिती या पत्राद्वारे देण्यात आली होती. संबंधित शिल्पकार यांना आदेश देऊन कायमस्वरूपी उपाययोजना करण्याबाबत तात्काळ कळवण्यात यावे ही विनंती, अशा स्वरूपाचे लेखी पत्र नौदलाला मालवणच्या सार्वजनिक बांधकाम विभागाकडून देण्यात आलं होतं.
हे पत्र माहितीसाठी जिल्हाधिकारी सिंधुदुर्ग जिल्हा परिषद सिंधुदुर्ग, कार्यकारी अभियंता सिंधुदुर्ग, तहसीलदार मालवण आणि पोलीस निरीक्षक मालवण यांनाही या पत्राच्या प्रती माहितीसाठी देण्यात आल्या होत्या. राजकोट किल्ल्यावर पर्यटकांची वर्दळ वर्षभर सुरू असते. पुतळा कोसळल्यानंतर आता पर्यटक, स्थानिक ग्रामस्थ, लोक प्रतिनिधी आदींनी याबाबत नाराजी व्यक्त केली आहे.
पंतप्रधान मोदींच्या हस्ते पुतळ्याचं ८ महिन्यांपूर्वी अनावरण, वादळी वाऱ्यामुळे शिवरायांचा पुतळा कोसळला
मात्र आता अशा स्वरूपाचं लेखी पत्र देऊन महाराष्ट्र शासनाच्या सार्वजनिक बांधकाम विभागाने या सगळ्या प्रकरणातून अंग झटकण्याचा प्रयत्न केला आहे का? असाही प्रश्न आता या निमित्ताने उपस्थित झाला आहे.
