वर्दे येथे २३ वर्षीय दामिनी पालव हिची हत्या; आरोपी फरार, शोधासाठी सहा पोलीस पथके तैनात…
कुडाळ | प्रतिनिध– सिंधुदुर्ग जिल्ह्यातील कुडाळ तालुक्यातील वर्दे येथे महाविद्यालयीन युवतीची चाकूने वार करून हत्या करण्यात आल्याची धक्कादायक घटना शनिवारी (दि. १७ ऑक्टोबर) सायंकाळी घडली. दामिनी किरण पालव (वय २३) असे मृत युवतीचे नाव आहे. या घटनेमुळे वर्दे परिसरासह संपूर्ण जिल्ह्यात खळबळ उडाली असून, फरार आरोपीचा शोध घेण्यासाठी सिंधुदुर्ग जिल्हा पोलिसांनी सहा पथके तैनात केली आहेत. तसेच जिल्ह्यातील विविध महत्त्वाच्या ठिकाणी नाकाबंदी करण्यात आली आहे.
घरी जात असताना युवतीवर हल्ला
मिळालेल्या प्राथमिक माहितीनुसार, दामिनी पालव ही हॉटेल मॅनेजमेंटचे शिक्षण घेत होती. शनिवारी सायंकाळी सुमारे ५.३० ते ६ वाजण्याच्या दरम्यान ती कडावल येथील बसस्थानकावर उतरून वर्दे येथील आपल्या घराकडे पायी जात होती. याचवेळी वाटेत तिच्यावर चाकूने वार करण्यात आले. या हल्ल्यात तिचा मृत्यू झाल्याची माहिती समोर आली आहे.
घटनेची माहिती मिळताच परिसरात एकच खळबळ उडाली. घटनेचे गांभीर्य लक्षात घेऊन पोलिसांनी तातडीने तपासाची चक्रे फिरवली. मात्र, हत्येनंतर आरोपी घटनास्थळावरून फरार झाला असून, त्याचा शोध घेण्यासाठी पोलिसांकडून व्यापक मोहीम हाती घेण्यात आली आहे.
वरिष्ठ पोलीस अधिकाऱ्यांची घटनास्थळी धाव
या घटनेची माहिती मिळताच सिंधुदुर्ग जिल्हा पोलीस अधीक्षक मोहन दहिकर आणि अपर पोलीस अधीक्षक नयोमी साटम यांनी घटनास्थळी भेट दिली. वरिष्ठ अधिकाऱ्यांच्या मार्गदर्शनाखाली तपास सुरू करण्यात आला असून, हत्येमागील कारण आणि आरोपीचा शोध घेण्याच्या दृष्टीने पोलिसांकडून विविध बाजूंनी तपास केला जात आहे.
आरोपीच्या शोधासाठी सहा पथके; जिल्ह्यात नाकाबंदी
फरार आरोपीला तातडीने अटक करण्यासाठी सिंधुदुर्ग पोलिसांनी सहा स्वतंत्र पथके तैनात केली आहेत. ओरोस येथील जिजामाता सर्कलसह जिल्ह्यातील महत्त्वाच्या ठिकाणी नाकाबंदी करण्यात आली आहे. आरोपीच्या हालचालींचा मागोवा घेऊन त्याला शोधण्याचे प्रयत्न सुरू आहेत.
दरम्यान, दामिनी पालव हिच्या हत्येमागील नेमके कारण अद्याप स्पष्ट झालेले नाही. पोलिसांकडून तपास सुरू असून, पुढील तपासात या घटनेबाबत अधिक माहिती समोर येण्याची शक्यता आहे.
**वर्दे परिसरात भीतीचे वातावरण*
महाविद्यालयीन युवतीची अशा प्रकारे हत्या झाल्याने वर्दे परिसरात भीतीचे वातावरण निर्माण झाले आहे. या घटनेमुळे नागरिकांमध्ये चिंता व्यक्त केली जात असून, फरार आरोपीला लवकरात लवकर अटक करण्याचे मोठे आव्हान पोलिसांसमोर आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
