नवरात्रोत्सवात अंतरा फाउंडेशनचा स्तुत्य उपक्रम!..संगमेश्वरातील शिक्षिका, अंगणवाडी सेविका, आशा सेविका व युवा गायिकेचा सन्मान; संभाजीनगरच्या नवदुर्गा देवी स्थापनेचा रौप्यमहोत्सव उत्साहात…

Spread the love

संगमेश्वर /प्रतिनिधी- नवरात्रोत्सवाचे औचित्य साधत अंतरा फाउंडेशन, रत्नागिरी–आंबेड बुद्रुक यांच्या वतीने संगमेश्वर परिसरातील विविध क्षेत्रांत उल्लेखनीय कार्य करणाऱ्या महिलांचा घरोघरी जाऊन सन्मान करण्यात आला. शिक्षण, बालसंगोपन आणि आरोग्यसेवा या क्षेत्रांत निष्ठेने कार्य करणाऱ्या महिलांना शाल, श्रीफळ व पुष्पगुच्छ देऊन गौरविण्यात आले. महिलांच्या कार्याची दखल घेणारा हा उपक्रम समाजासाठी प्रेरणादायी ठरला.

शिक्षण, बालसंगोपन आणि आरोग्यसेवेतील महिलांचा गौरव…

समाजाच्या जडणघडणीत महत्त्वाची भूमिका बजावणाऱ्या महिलांच्या योगदानाचा सन्मान करण्यासाठी फाउंडेशनने हा विशेष उपक्रम राबविला.

सन्मानित महिलांची नावे पुढीलप्रमाणे :

शिक्षण क्षेत्र : जिल्हा परिषद केंद्र शाळा, संगमेश्वर नं. २ येथील आदर्श शिक्षिका रेखा जाधव.
अंगणवाडी सेवा : रामपेठ येथील अंगणवाडी सेविका पल्लवी सचिन शेरे.
अंगणवाडी मदतनीस : रामपेठ येथील शीतल दिनेश अंब्रे आणि संभाजीनगर येथील माया जाधव.
आशा सेविका : नावडी येथील वृषाली विनय मुरकर, संभाजीनगर येथील सारिका विशाल पवार आणि रामपेठ येथील अर्पिता विजयानंद शेट्ये.

आपल्या कार्यातून समाजाच्या आरोग्य, शिक्षण आणि बालविकास क्षेत्रात योगदान देणाऱ्या या महिलांचा सन्मान झाल्याने त्यांनी आनंद व समाधान व्यक्त केले.

संभाजीनगरच्या नवदुर्गा मंडळाचा रौप्यमहोत्सव…

संभाजीनगर येथे नवदुर्गा देवीच्या स्थापनेला यंदा २५ वर्षे पूर्ण झाल्याने रौप्यमहोत्सव साजरा करण्यात येत आहे. या निमित्ताने नवतरुण मित्र मंडळाचे अध्यक्ष गणेश पवार यांनी अंतरा फाउंडेशनच्या पदाधिकाऱ्यांचा पुष्पगुच्छ देऊन विशेष सन्मान केला.

यावेळी फाउंडेशनच्या अध्यक्षा नुपुरा उन्मेष मुळ्ये, सचिव राजेश आंबेकर, उपाध्यक्षा सरिता आंबेकर, कार्यकर्त्या सुमनताई झगडे, रोहिणी सुर्वे आणि नावडी येथील सामाजिक कार्यकर्ते दिनेशभाई अंब्रे यांचा गौरव करण्यात आला. नवरात्र मित्र मंडळाचे अध्यक्ष गणेश पवार आणि उपाध्यक्ष आकाश कुऱ्हाडे यांनी नुपुरा मुळ्ये यांचे विशेष आभार मानले.

देवीदर्शनासोबत सामाजिक प्रबोधनाचा जागर…

या दौऱ्यादरम्यान फाउंडेशनच्या पदाधिकाऱ्यांनी पाग-आळी (नावडी) येथील निनावी देवी मंदिरात तसेच घनश्याम प्रसादे यांच्या घरगुती देवीचे दर्शन घेतले. निधळेवाडी येथे स्थापन करण्यात आलेल्या दुर्गामातेचेही दर्शन घेण्यात आले.

या प्रसंगी अंतरा फाउंडेशनच्या अध्यक्षा नुपुरा मुळ्ये आणि सामाजिक कार्यकर्ते दिनेश अंब्रे यांनी आपल्या मनोगतातून ग्रामीण महिला दिन, वाचन प्रेरणा दिन आणि नवरात्रातील नवदुर्गेचे महत्त्व विशद केले. धार्मिक उत्सवातून सामाजिक जागृती, महिला सक्षमीकरण आणि वाचनसंस्कृतीचा प्रसार करण्याचा संदेश यावेळी देण्यात आला.

‘पाणी आडवा, पाणी जिरवा’चा संदेश…

निधळेवाडी येथे महिलांशी संवाद साधताना नुपुरा मुळ्ये यांनी ‘पाणी आडवा, पाणी जिरवा’ या संकल्पनेचे महत्त्व अधोरेखित केले. दैनंदिन जीवनातील पाण्याचे महत्त्व, जलसंधारणाची गरज आणि नवरात्रोत्सवाचे सांस्कृतिक व सामाजिक महत्त्व याबाबत त्यांनी मार्गदर्शन केले.

युवा गायिका गौतमी वाडकर हिचा ‘नवदुर्गा सन्मान’..

नवदुर्गा सन्मान उपक्रमांतर्गत निधळेवाडी येथील युवा गायिका गौतमी वाडकर हिचाही शाल, श्रीफळ आणि भेटवस्तू देऊन गौरव करण्यात आला. स्थानिक कलागुणांना प्रोत्साहन देण्याच्या दृष्टीने हा सन्मान महत्त्वपूर्ण ठरला.

सामाजिक बांधिलकी जपणारा उपक्रम…

महिलांच्या कार्याचा गौरव, धार्मिक परंपरांचे जतन, सामाजिक प्रबोधन, जलसंधारणाचा संदेश आणि स्थानिक कलागुणांना प्रोत्साहन अशा विविध अंगांनी अंतरा फाउंडेशनचा हा उपक्रम वैशिष्ट्यपूर्ण ठरला. नवरात्रोत्सवाच्या निमित्ताने समाजासाठी निष्ठेने कार्य करणाऱ्या महिलांना सन्मानित करून त्यांच्या योगदानाची दखल घेण्यात आली. या उपक्रमातून महिला सन्मान आणि सामाजिक बांधिलकीचा सकारात्मक संदेश देण्यात आला.