रत्नागिरी : जिल्ह्यात मुसळधार पाऊस सुरू झाला आहे. मात्र, बुधवारी पावसाची संततधार आता कमी झाली असून गुरुवारी पाऊस सरींवर पडत होता. सकाळी १० वाजता संपलेल्या २४ तासांत पावसाने दमदार हजेरी लावली असून, जिल्ह्यात सरासरी पाऊस ९५.८७ मिमी इतका नोंदवला गेला आहे. या मुसळधार पावसामुळे खेड तालुक्यातील जगबुडी आणि लांजा येथील काजळी नदी वगळता जिल्ह्यातील अन्य सर्व प्रमुख नद्यांच्या पात्रात अजूनही घट दिसत आहे.
जिल्ह्यात सर्वच तालुक्यांमध्ये दमदार पाऊस सुरू आहे. बुधवारी जिल्ह्याला रेड अलर्ट जाहीर करण्यात आला होता. त्यामुळे दिवसभर पाऊस मुसळधारेने पडत होता. गुरुवारी थोडीशी उघडीप, तर मध्येच जोरदार सरी पडत होत्या. बुधवारपेक्षा पावसाचा जोर कमी दिसत होता. गुरुवारी सकाळी १० वाजता संपलेल्या २४ तासांत जिल्ह्यात एकूण ८६२.८९ मिमी पावसाची (सरासरी ९५.८७ मिमी) इतकी नोंद झाली आहे. सर्वाधिक पाऊस मंडणगड तालुक्यात पडला असून मंडणगडसह रत्नागिरी, राजापूर, गुहागर आणि दापोली या तालुक्यांनी १०० मिमीचा टप्पा ओलांडला आहे.
पावसाची सुरुवात जुलै महिन्याच्या सुरुवातीपासून दमदार सुरू असली तरी जून महिन्याच्या सरासरीच्या केवळ ६४ टक्के पाऊस पडला असल्याने खेडमधील जगबुडी आणि लांजा येथील काजळी नदी वगळता उर्वरित मुख्य सहा नद्यांच्या पात्रात अजूनही घट आहे. खेडमधील जगबुडी नदीची पाणीपातळी ४.६० मीटरवर पोहोचली आहे. या नदीची इशारा पातळी ५ मीटरवर आहे, तर काजळी नदीची पाणीपातळी १३.५० मीटरवर पोचली आहे. या नदीची इशारा पातळी १६.५० मीटरवर आहे. मुचकुंदी नदीची पाणीपातळी केवळ ०.३५ मीटरवर आहे.
जुलै महिन्याच्या सुरुवातीला मुसळधारेने सुरू झालेला पाऊस महिनाभर चांगला पडला तर जुलै महिन्याची सरासरी पूर्ण करू शकेल. त्यामुळे शेतकरी सध्या जुलै महिन्याच्या पावसावर अवलंबून आहेत. जून महिन्यापेक्षा जुलै महिन्यात साधारणत: ४०० मिलीमीटर अधिक पाऊस पडतो. त्यामुळे जून महिन्यात पावसाने निराशा केली तरी जुलै महिन्यात कसर भरून काढण्याची अपेक्षा व्यक्त केली जात आहे.
जिल्ह्यातील प्रमुख नद्यांची गुरूवारी सकाळची पाणीपातळी (मीटरमध्ये)
*नदी – पाणीपातळी – इशारा पातळी-*
*जगबुडी (खेड) – ४.६० – ५*
*वाशिष्ठी नदी (चिपळूण) – १.६५ – ५*
*शास्त्री नदी (संगमेश्वर) – ३.६० – ६.२०*
*सोनवी (संगमेश्वर) – ३.६० – ६.२०*
*काजळी नदी लांजा – १३.५० – १६.५०*
*कोदवली नदी (राजापूर पूल) – १.८० – ४.९०*
*मुचकुंडी नदी (लांजा) – ०.३५ – ३.५०*
*बावनदी (संगमेश्वर) – ५.५२ – ९.४०*
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
