कोंदिवडे ग्रामपंचायत हद्दीतील रस्त्याच्या दुरवस्थेची शाळकरी मुलींनी केलेली भन्नाट रिपोर्टिंग व्हायरल झाली…
कर्जत : तालुक्यातील अतिदुर्गम भागातील कोंदिवडे ग्रामपंचायत हद्दीतील रस्त्याच्या दुरवस्थेची शाळकरी मुलींनी केलेली भन्नाट रिपोर्टिंग व्हायरल झाली. शनिवारी गंमतीदार अंदाजात केलेल्या या रिपोर्टिंगमधून १५ वर्षांपासून दुरुस्तीच्या प्रतीक्षेत असलेल्या रस्त्याची गंभीर परिस्थिती समोर आणली. साेमवारी या व्हिडीओची तत्काळ दखल घेत प्रशासनाने येथे खडीचा भराव टाकून तात्पुरती डागडुजी केली.
ज्ञान मकरंद विद्यालय येथे दहावीत शिकणाऱ्या नेहा घारे, ज्योत्स्ना आणि मानसी पवार आदी विद्यार्थिनी शाळा सुटल्यानंतर दीड किलोमीटर रस्त्याने पायी खरवंडी गावाकडे जातात. रोजच्या प्रवासात रस्त्यावर पडलेले मोठमोठे खड्डे आणि त्यात साचलेले पाणी पाहून या मुलींनी शनिवारी चक्क पत्रकार बनून या गंभीर परिस्थितीचे रिपोर्टिंग करण्याचा निर्णय घेतला. हातातील छत्रीलाच माइक बनवत नेहा घारे हिने थेट रिपोर्टिंगला सुरुवात केली. ‘आपण सध्या कोंदिवडे रस्त्यावर आहोत. या रस्त्याबाबत तुम्ही काय सांगाल’, असा सवाल तिने आपली मैत्रीण ज्योत्स्नाला केला.
त्यावर ज्योत्स्नाने मिश्कील मात्र मार्मिक उत्तर दिले. ‘गावातील रस्ता जणू द्रुतगती महामार्गासारखा आहे; या रस्त्यावर अशा गाड्या चालतात की त्यांच्या पोटातील पाणीही हलत नाही’, असा टोला ज्योत्स्नाने लगावला. रविवारी हा व्हिडीओ व्हायरल झाला. यानंतर प्रशासनाने खडीचा भराव टाकून तात्पुरती दुरुस्ती केली आहे.
सर्वाधिक पाऊस पडल्याने पडले खड्डे....
कर्जतमध्ये सर्वाधिक पाऊस पडल्याने हे रस्ते खराब झाले आहे. तसेच, खड्डे भरण्याचे काम तात्काळ सुरू केले असून पावसाळा संपला की रस्ता करण्यात येईल, असे आ. महेंद्र थोरवे यांनी सांगितले.
नेहा घारे, ज्योत्स्ना आणि मानसी पवार या विद्यार्थिनी रस्त्याच्या दुरवस्थेची केलेली भन्नाट रिपोर्टिंग व्हायरल झाली. हा व्हिडीओ व्हायरल झाल्यानंतर प्रशासनाकडून खडीचा भराव टाकून या रस्त्याची तात्पुरती दुरुस्ती करण्यात आली आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
