चिपळूण तालुक्यातील एका तरुणीशी प्रेमविवाह केला होता..
चिपळूण : शहरातील फरशी तिठा पुलाजवळील वाशिष्ठी नदीत गुरुवार, २५ जून रोजी सकाळी एका व्यक्तीचा मृतदेह आढळल्याने परिसरात खळबळ उडाली. मृत व्यक्ती मुंबई येथे वास्तव्यास असल्याची माहिती समोर आली असून, चिपळूण पोलिसांनी आकस्मिक मृत्यूची नोंद करून तपास सुरू केला आहे. अमित शहा असे या प्रौढाचे नाव आहे.
पोलिसांनी दिलेल्या माहितीनुसार, अमित शहा अंदाजे ४० वर्षांचे असून, ते मूळचे गुजरात येथील रहिवासी होते. गेल्या काही वर्षांपासून ते मुंबई येथे वास्तव्यास होते. सुमारे १२ वर्षांपूर्वी त्यांनी चिपळूण तालुक्यातील एका तरुणीशी प्रेमविवाह केला होता. ते २१ जून रोजी रेल्वेने चिपळूण येथे आल्याची माहिती मिळाली आहे.
गुरुवारी सकाळी फरशी तिठा पुलाजवळील वाशिष्ठी नदीत एका व्यक्तीचा मृतदेह पाण्यावर तरंगताना स्थानिकांना दिसला. ही माहिती मिळताच चिपळूण पोलिसांनी तातडीने घटनास्थळी धाव घेतली. स्थानिकांच्या सहकार्याने मृतदेह नदीतून बाहेर काढण्यात आला. त्यानंतर ओळख पटवून मृतदेह शवविच्छेदनासाठी कामथे उपजिल्हा रुग्णालयात पाठविण्यात आला.
या घटनेमागील कारणांचा शोध घेण्यासाठी पोलिसांकडून सर्व बाजूंनी तपास सुरू असून, शवविच्छेदन अहवालानंतर मृत्यूचे नेमके कारण स्पष्ट होणार असल्याची माहिती पोलिसांनी दिली.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
