मंडणगड – (प्रतिनिधी) दि.: येथील सावित्रीबाई फुले शिक्षण प्रसारक मंडळाच्या लोकनेते गोपीनाथजी मुंडे कला, वाणिज्य व विज्ञान महाविद्यालयात सांस्कृतिक विभाग व राष्ट्रीय सेवा योजना विभाग यांच्या वतीने नुकतीच राजर्षि शाहू महाराज यांची 152 वी जयंती ‘सामाजिक न्यायदिन’ म्हणून उत्साहात साजरी करण्यात आली. प्रभारी प्राचार्य डॉ. वाल्मीक परहर कार्यक्रमाच्या अध्यक्षस्थानी होते. यावेळी उपप्राचार्य विष्णू जायभाये, सांस्कृतिक विभागाच्या डॉ. संगीता घाडगे, डॉ. महेश कुलकर्णी, ग्रंथपाल डॉ. दगडू जगताप आदी मान्यवर उपस्थित होते.
कार्यक्रमाच्या सुरुवातीला प्रभारी प्राचार्य डॉ. वाल्मीक परहर यांच्या हस्ते राजर्षि शाहू महाराज यांच्या प्रतिमेस पुष्पहार अर्पण करुन अभिवादन करण्यात आले. तत्पूर्वी डॉ. संगीता घाडगे यांनी उपस्थितांचे स्वागत करून कार्यक्रमाचा उद्देश स्पष्ट केला व शाहू महाराज यांच्या कार्याविषयी थोडक्यात माहिती सांगितली.
यावेळी बोलताना प्रभारी प्राचार्य डॉ. वाल्मीक परहर यांनी सांगितले की, राजर्षी शाहू महाराजांचे विचार आणि कार्य हे आजही समाजाला दिशा देणारे आसून बहुजन समाजाला मुख्य प्रवाहात आणण्याचे महत्त्वाचे काम त्यांनी केले. सामाजिक विषमता नष्ट करून समाजात समानता प्रस्थापित करण्यासाठी शाहू महाराजांनी फार मोठे कार्य केले आहे. शिक्षणाचे दरवाजे सर्वांसाठी खुले केले. कला, क्रीडा, साहित्य, संगीत आदी क्षेत्रामध्ये सर्वांना सामावून घेतले आणि समाजाला एकत्रित आणण्याचा प्रयत्न केला. अशा या थोर राजाचा आदर्श डोळयासमारे ठेवून त्या मार्गाने वाटचाल करण्याचा प्रयत्न केला पाहिजे.
शेवटी उपस्थितांचे आभार डॉ. महेश कुलकर्णी यांनी मानले. कार्यक्रमास सर्व शिक्षक- शिक्षकेतर कर्मचारी व विद्यार्थी उपस्थित होते.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
