चिपळूण : ठाकरे शिवसेनेचे नेते तथा आमदार भास्कर जाधव यांनी भाजपमध्ये यावे, अशी खुली ऑफर विधान परिषदेचे भाजप आमदार प्रमोद जठार यांनी दिली. भास्कर जाधव यांच्यासारख्या अनुभवी आणि ज्येष्ठ नेत्याचा त्यांच्या पक्षाकडून योग्य वापर होत नसल्याचा दावा करत, कोकणच्या विकासासाठी सर्वांनी एकत्र येण्याची गरज असल्याचे त्यांनी सांगितले.
चिपळूण येथे स्वर्गीय अजितदादा पवार यांच्या जयंतीनिमित्त आयोजित कार्यक्रमात प्रमोद जठार आणि भास्कर जाधव यांनी एकत्र वृक्षारोपण केले. त्यानंतर प्रसारमाध्यमांशी बोलताना जठार यांनी भास्कर जाधव हे कोकणातील ज्येष्ठ आणि अनुभवी आमदार असून, त्यांच्या कार्याचा योग्य सन्मान व्हायला हवा, असे सांगत त्यांचे कौतुक केले.
यावेळी दक्षिण रत्नागिरी भाजपचे अध्यक्ष प्रशांत यादव, सहदेव बेटकर आदी उपस्थित होते.
दरम्यान, दिल्लीतील जंतर-मंतर येथे सुरू असलेल्या CJP आंदोलनाबाबत बोलताना जठार यांनी आंदोलनात विघातक आणि देशविरोधी प्रवृत्तीच्या लोकांनी घुसखोरी केल्याचा आरोप केला. NEET प्रश्नपत्रिका गैरव्यवहार प्रकरणातील दोषींवर कठोर कारवाई करण्यास पंतप्रधान नरेंद्र मोदी सक्षम आहेत, असा विश्वासही त्यांनी व्यक्त केला.
यावेळी त्यांनी विरोधकांवरही टीका करत, विरोधी पक्षांकडे प्रभावी नेतृत्व उरलेले नसल्यामुळे त्यांना काँग्रेसचा आधार घ्यावा लागत असल्याचा दावा केला. तसेच राहुल गांधी यांच्या नेतृत्वाखाली आंदोलन करून काँग्रेसने स्वतःचेच राजकीय नुकसान करून घेतल्याचेही प्रमोद जठार यांनी म्हटले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
