खेड :- तालुक्यातील आंबडस येथे एका
व्यक्तीने दोन भावांवर कोयत्याने हल्ला केल्याची घटना घडली .
पोलिसांनी दिलेल्या माहितीनुसार, ही घटना १३ एप्रिल २०२५ रोजी सायंकाळी ६.३० वाजता घडली. या हल्ल्यात संजय गंगाराम चव्हाण (२६) आणि त्यांचा भाऊ नितीन गंगाराम चव्हाण (३६), दोघेही रा. आंबडस, ता. खेड) हे गंभीर जखमी झाले आहेत. खेड पोलिसांनी सतीश नथुराम साळुंखे (वय ४४, रा. धुत्रोली, ता. मंडणगड) याच्या विरोधात गुन्हा दाखल केला आहे.
फिर्यादी संजय यांचा भाऊ अजित आणि त्याची पत्नी वैष्णवी यांनी संजय आणि दुसरे भाऊ नितीन यांना घरी बोलावले होते. घरी गेल्यानंतर वैष्णवी वारंवार शिवीगाळ करत असल्याची तक्रार संजय यांनी सतीश साळुंखेकडे केली. यामुळे संतप्त सतीशने संजयला शिवीगाळ करत ठार मारण्याची धमकी दिली. संजयने त्याचे कारण विचारल्याने सतीशने लोखंडी कोयता उचलून संजय आणि नितीन यांच्या डोक्यात मारला.
या हल्ल्यामुळे परिसरात आरडाओरडा सुरू झाला. आवाज ऐकून फिर्यादीची पत्नी अरुणा, मुली काजल आणि पुनम तसेच नितीनची पत्नी मेघा चव्हाण घटनास्थळी धावल्या. संजय यांनी आपला जीव वाचवण्यासाठी आरोपीसोबत झटापट केली. या हल्ल्यात जखमी झालेल्या संजय आणि नितीन यांना उपचारासाठी कामथे, ता. चिपळूण येथील सरकारी दवाखान्यात दाखल करण्यात आले. संजय यांनी स्वतः पोलीस ठाण्यात जाऊन सतीश साळुंखे याच्या विरोधात मारहाणीची तक्रार दाखल केली आहे.
