संगमेश्वर/दिनेश अंब्रे- गणेशोत्सवाचे वेध लागताच संपूर्ण महाराष्ट्रात उत्साहाचे वातावरण निर्माण होते. बाप्पाच्या आगमनाबरोबरच घरोघरी येणाऱ्या लाडक्या गौरींच्या स्वागताची तयारीही तितक्याच जल्लोषात सुरू होते. संगमेश्वर तालुक्यातील नावडी येथील भाजी गल्लीत असलेल्या प्रसिद्ध ‘सिद्धीविनायक कला केंद्रात’ सध्या हाच उत्साह आणि लगबग पाहायला मिळत आहे. या कला केंद्राचे मालक श्री. औदूत खातू (सर) यांच्या कारखान्यात सध्या गौरीचे नयनरम्य मुखवटे बनवणे आणि त्यांच्या रंगकामाचे काम अंतिम टप्प्यात आले आहे.
गौरीचे सुंदर मुखवटे तयार करणे, त्यांना पारंपरिक आणि आधुनिक अशा दोन्ही पद्धतींनी सजवणे, तसेच त्यांच्या डोळ्यांचे आणि चेहऱ्याचे नाजूक रंगकाम करणे यात खातू सर आणि त्यांचे कारागीर मग्न आहेत. अत्यंत आकर्षक आणि सजीव वाटणारे हे मुखवटे पाहण्यासाठी आणि त्यांची खरेदी करण्यासाठी आतापासूनच भाविकांची पावले नावडी येथील कला केंद्राकडे वळू लागली आहेत.उत्सवाच्या तोंडावर कमी वेळात दर्जेदार काम पूर्ण करण्याचे मोठे आव्हान कलाकारांसमोर असते, मात्र कलात्मकतेची ही परंपरा सिद्धीविनायक कला केंद्राने यंदाही तितक्याच उत्साहाने जपल्याचे दिसून येत आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
