रत्नागिरी | प्रतिनिधी- दिव्यांग नागरिकांना बँकिंग सेवा सुलभपणे उपलब्ध व्हाव्यात, या उद्देशाने उभारण्यात आलेले रॅम्पच प्रत्यक्षात अडथळा ठरत असल्याची गंभीर बाब रत्नागिरीतील स्टेट बँक ऑफ इंडिया, खारेघाट रोड मुख्य शाखेत समोर आली आहे. या पार्श्वभूमीवर आरएचपी फाउंडेशनच्या वतीने शाखा व्यवस्थापक मधुरा नाईक यांना निवेदन देत रॅम्पमध्ये तातडीने सुधारणा करण्याची मागणी करण्यात आली.
फाउंडेशनच्या प्रतिनिधींनी शाखेची प्रत्यक्ष पाहणी केली असता, मुख्य प्रवेशद्वारावरील रॅम्पसमोरच भिंत असल्याने व्हीलचेअरधारक तसेच दिव्यांग व्यक्तींना त्याचा वापर करणे जवळपास अशक्य होत असल्याचे निदर्शनास आले. तसेच एटीएममधील रॅम्पदेखील निर्धारित मानकांनुसार नसल्यामुळे दिव्यांगांसह ज्येष्ठ नागरिक आणि सर्वसामान्य नागरिकांनाही गैरसोयीचा सामना करावा लागत असल्याचे निवेदनात नमूद करण्यात आले.
आरएचपी फाउंडेशनने याकडे दिव्यांग व्यक्तींच्या समान आणि सुलभ प्रवेशाच्या घटनात्मक अधिकाराशी संबंधित गंभीर प्रश्न म्हणून लक्ष वेधत, संबंधित रॅम्पची तातडीने पुनर्बांधणी करून तो मानकांनुसार तयार करण्याची मागणी केली.
*आरएचपी फाउंडेशनचे अध्यक्ष सादिक नाकाडे म्हणाले…*
*“दिव्यांगांसाठी सुविधा उभारणे ही केवळ औपचारिकता नसून ती त्यांच्या सन्मानाने जगण्याच्या अधिकाराशी जोडलेली जबाबदारी आहे. केवळ रॅम्प उभारून उपयोग नाही, तो प्रत्यक्ष वापरण्यायोग्य असणे तितकेच आवश्यक आहे. प्रशासन आणि सर्व सार्वजनिक संस्थांनी दिव्यांगांसाठी सुलभ वातावरण निर्माण करणे ही काळाची गरज आहे.”*
दिव्यांग जनकल्याण संस्थेचे अध्यक्ष संजय सुर्वे यांची प्रतिक्रिया…
*“दिव्यांग व्यक्तींना प्रत्येक ठिकाणी अडथळ्यांचा सामना करावा लागतो. अशा त्रुटी त्वरित दूर झाल्या तर दिव्यांगांना आत्मनिर्भरपणे सर्व सेवा घेणे शक्य होईल.”*
शाखा व्यवस्थापक मधुरा नाईक यांचे आश्वासन…
*“दिव्यांग प्रतिनिधींनी मांडलेल्या अडचणी गांभीर्याने घेतल्या असून, संबंधित बाबींची वरिष्ठांकडे माहिती पाठवून मानकांनुसार नवीन व सुरक्षित रॅम्प उभारण्यासाठी आवश्यक कार्यवाही करण्यात येईल.”*
फाउंडेशनच्या वतीने स्पष्ट करण्यात आले की, योग्य कालावधीत सुधारणा न झाल्यास जिल्हाधिकाऱ्यांकडे तक्रार दाखल करून पुढील कायदेशीर पाठपुरावा करण्यात येईल.
यावेळी आरएचपी फाउंडेशनचे अध्यक्ष सादिक नाकाडे, सदस्य समीर नाकाडे, शकिरा कुरेशी, दिव्यांग जनकल्याण संस्थेचे अध्यक्ष संजय सुर्वे, उपाध्यक्ष किरण धनावडे, चिपळूण दिव्यांग संस्थेचे अध्यक्ष अशोक भुस्कुटे तसेच सदस्य अमृता भुस्कुटे उपस्थित होते.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
