राजापूर | प्रतिनिधी- कोकण रेल्वे मार्गावरील राजापूर रोड रेल्वे स्थानकात मंगळवारी रात्री साडेनऊच्या सुमारास प्रवासी प्रतीक्षालयाचे सिलिंग अचानक कोसळल्याने एकच खळबळ उडाली. सुदैवाने त्याचवेळी मुंबईकडे जाणारी कोकणकन्या एक्स्प्रेस स्थानकात येत असल्याने प्रतीक्षालयातील सर्व प्रवासी प्लॅटफॉर्मवर गेले होते. त्यामुळे संभाव्य मोठी जीवितहानी थोडक्यात टळली.
प्रत्यक्षदर्शींच्या माहितीनुसार, काही क्षणांचा जरी उशीर झाला असता तर अनेक प्रवासी सिलिंगखाली अडकून गंभीर दुर्घटना घडली असती. या घटनेनंतर स्थानक परिसरात काही काळ भीतीचे आणि गोंधळाचे वातावरण निर्माण झाले.
घटनेची माहिती मिळताच स्थानक प्रशासनाने तातडीने घटनास्थळी धाव घेतली. कोसळलेल्या सिलिंगखाली कोणी अडकले आहे का, याची पाहणी करण्यात आली. सुदैवाने या दुर्घटनेत कोणतीही जीवितहानी किंवा दुखापत झाली नाही.
या घटनेची माहिती मिळताच सार्वजनिक बांधकाम विभागाच्या राजापूर विभागातील अधिकाऱ्यांनी घटनास्थळी भेट देऊन पाहणी केली. कोसळलेले सिलिंग हटवून दुरुस्तीचे काम तातडीने सुरू करण्यात आले असून, पुढील धोका टाळण्यासाठी संबंधित परिसर सुरक्षित करण्यात आला आहे.
दोन वर्षांत दुसऱ्यांदा घटना; कामाच्या दर्जावर प्रश्नचिन्ह..
विशेष म्हणजे, गेल्या दोन वर्षांतील ही अशाच प्रकारची दुसरी घटना आहे. शासनाच्या पर्यटन विकास योजनेअंतर्गत सुमारे दोन कोटी रुपयांचा निधी खर्च करून सार्वजनिक बांधकाम विभागामार्फत राजापूर रोड रेल्वे स्थानकाचे सुशोभीकरण आणि आधुनिकीकरण करण्यात आले होते. मात्र, काम सुरू असतानाच यापूर्वीही छताचा काही भाग कोसळल्याची घटना घडली होती.
आता पुन्हा प्रतीक्षालयाचे सिलिंग कोसळल्याने बांधकामाचा दर्जा, वापरण्यात आलेले साहित्य आणि देखभाल व्यवस्थेवर गंभीर प्रश्नचिन्ह निर्माण झाले आहे. लाखो रुपयांचा निधी खर्च करूनही अशा घटना घडत असल्याने प्रवासी आणि स्थानिक नागरिकांमध्ये तीव्र नाराजी व्यक्त होत आहे.
निष्पक्ष चौकशीची जोरदार मागणी…
या घटनेनंतर रेल्वे प्रवासी, स्थानिक नागरिक आणि विविध सामाजिक संघटनांनी संपूर्ण प्रकरणाची सखोल चौकशी करून दोषींवर कठोर कारवाई करावी, तसेच स्थानक परिसरातील सर्व इमारती आणि बांधकामांची तातडीने तांत्रिक तपासणी करण्यात यावी, अशी जोरदार मागणी केली आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
