चिपळूण : गेल्या काही दिवसांपासून विविध मुद्द्यांवरून एकमेकांवर टीकास्त्र सोडणारे विधान परिषदेचे भाजप आमदार प्रमोद जठार आणि ठाकरे शिवसेनेचे आमदार भास्कर जाधव मंगळवारी चिपळूणमध्ये एकाच व्यासपीठावर आले. स्वर्गीय अजितदादा पवार यांच्या जयंतीनिमित्त आयोजित सर्वपक्षीय वृक्षारोपण कार्यक्रमात दोन्ही नेत्यांची गळाभेट झाल्याने राजकीय वर्तुळात चर्चेला उधाण आले आहे.
कार्यक्रमादरम्यान प्रमोद जठार यांनी भास्कर जाधव यांना मिठी मारत “मिले सुर मेरा तुम्हारा” अशी मिश्कील टिप्पणी केली. या अनपेक्षित प्रसंगाने उपस्थितांमध्ये हशा पिकला, तर दोन्ही नेत्यांच्या गळाभेटीची चर्चा कार्यक्रमानंतरही रंगत राहिली. यावेळी भाजप जिल्हाध्यक्ष प्रशांत यादव उपस्थित होते.
काही दिवसांपूर्वी गुहागर येथे झालेल्या स्वच्छता अभियानादरम्यान प्रमोद जठार यांनी “गुहागरमधील कचरा आम्ही साफ करू,” असे वक्तव्य करत भास्कर जाधव यांच्यावर अप्रत्यक्ष टीका केली होती. त्यानंतर लोटे एमआयडीसीच्या दौऱ्यात “भास्कर जाधव मतदारसंघाचे आमदार असले, तरी एमआयडीसीचा पालक आमदार मीच आहे,” असे विधान करून त्यांनी पुन्हा राजकीय वातावरण तापवले होते.
या पार्श्वभूमीवर चिपळूणमधील कार्यक्रमात झालेली दोन्ही नेत्यांची गळाभेट विशेष महत्त्वाची मानली जात आहे. मात्र या भेटीतून राजकीय कटुता कमी झाल्याचा संदेश गेला की सार्वजनिक कार्यक्रमातील ही केवळ औपचारिकता होती, याबाबत राजकीय वर्तुळात विविध चर्चांना उधाण आले आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
