*रत्नागिरी :* सहकार क्षेत्रातील पदाधिकारी, संचालक, सदस्य आणि कार्यकर्त्यांचे ज्ञान अद्ययावत करून सक्षम नेतृत्व घडविण्याच्या उद्देशाने रत्नागिरी जिल्हा मध्यवर्ती सहकारी बँकेने निवासी सहकार कार्यकर्ता प्रशिक्षणाचे आयोजन केले आहे. हे प्रशिक्षण ३१ जुलै ते २ ऑगस्ट २०२६ या कालावधीत निवासी स्वरूपात होणार असून सहकार क्षेत्रातील तज्ज्ञांकडून विविध विषयांवर मार्गदर्शन करण्यात येणार आहे.
आजच्या स्पर्धात्मक वातावरणात सहकारी संस्थांसमोर उभ्या राहणाऱ्या विविध आव्हानांचा विचार करून सहकारी कायदे, आर्थिक व्यवस्थापन, संचालक मंडळाच्या जबाबदाऱ्या, लेखापरीक्षण, बँकिंग क्षेत्रातील बदलते तंत्रज्ञान तसेच संस्थांचे प्रभावी प्रशासन या विषयांवर प्रशिक्षणार्थींना सखोल माहिती दिली जाणार आहे.
या प्रशिक्षणासाठी डॉ. विठ्ठलराव विखे पाटील प्रबंध संस्थान, पुणे तसेच कृषिभूषण डॉ. तानाजीराव चोरगे शिक्षण व संशोधन संस्था, मांडकी-पालवण (ता. चिपळूण) यांचे सहकार्य लाभणार आहे.
सहकारी संस्थांचे पदाधिकारी, सदस्य, संचालक तसेच सहकार क्षेत्रात कार्य करण्याची इच्छा असलेल्या युवकांनी या प्रशिक्षणाचा लाभ घ्यावा, असे आवाहन रत्नागिरी जिल्हा मध्यवर्ती सहकारी बँकेने केले आहे.
प्रशिक्षणासाठी इच्छुकांनी प्रवेश अर्ज व आवश्यक माहिती आपल्या तालुक्यातील बँकेच्या क्षेत्रीय कार्यालयातून किंवा रत्नागिरी येथील मुख्य कार्यालयातील प्रशासन विभागातून प्राप्त करून २८ जुलै २०२६ रोजी सायंकाळी ५ वाजेपर्यंत अर्ज सादर करावेत. प्रशिक्षण यशस्वीरीत्या पूर्ण करणाऱ्या सर्व सहभागींस प्रशिक्षण संस्थेमार्फत प्रमाणपत्र प्रदान करण्यात येणार असल्याची माहिती बँकेने दिली.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
