रत्नागिरी :- काही दिवसांपूर्वी तालुक्यातील फणसवळे येथे सड्यावर जनावरांचे अवशेष सापडलेले असतानाच गोवंश मांसाची विक्री करणाऱ्या एकाला स्थानिक गुन्हे अन्वेषण शाखेच्या पथकाने रंगेहाथ पकडले.
पोलिसांनी दिलेल्या माहितीनुसार, ही कारवाई शुक्रवारी (२६ जून) सायंकाळी शहरातील उद्यमनगर येथे करण्यात आली असून, ५१ किलो ५०० ग्रॅम मांसासह १ लाख ०६ हजार ४८० रुपयांचा मुद्देमाल जप्त करण्यात आला आहे. लियाकत शौकत दावत (वय ४८, रा. लांजेकर नगर, उद्यमनगर, रत्नागिरी) असे अटक केलेल्या संशयिताचे नाव आहे. याप्रकरणी स्थानिक गुन्हे अन्वेषण शाखेतील हेडकॉन्स्टेबल गणेश सावंत यांनी फिर्याद दिली आहे. त्यानुसार, मोहरमच्या पार्श्वभूमीवर संपूर्ण जिल्ह्यात पोलिस बंदोबस्त ठेवण्यात आला होता. याच अनुषंगाने स्थानिक गुन्हे अन्वेषण शाखेचे एक पथक शहरात गस्त घालत होते. या गस्तीदरम्यान लांजेकर नगर येथे लियाकत दावत याच्याकडे विनापरवाना गोवंश प्राण्यांचे मांस विक्रीसाठी ठेवल्याचे सापडले.
पोलिसांनी त्याला अटक करून पशुधन विकास अधिकारी यांच्याकडून मांसाची प्राथमिक खात्री करून ५१ किलो ५०० ग्रॅम मांस जप्त केले आहे. तसेच एक दुचाकी, डीपफ्रिजर असा एकूण १ लाख ०६ हजार ४८० रुपयांचा मुद्देमाल जप्त केला आहे. याप्रकरणी लियाकत दावत याच्यावर रत्नागिरी शहर पोलिस स्थानकात भारतीय न्यायसंहिता अधिनियम २०२३ चे कलम ३२५, सह महाराष्ट्र पशू संरक्षण (सुधारणा) अधिनियम २०१५ चे कलम ५ (ब), ५ (क), ९ (अ), मोटार वाहन कायदा १९८८ चे कलम ६६ (१), १९२ (अ) अन्वये गुन्हा दाखल करण्यात आला आहे.
फणसवळे येथे अवशेष टाकणारा मोकाट
काही दिवसांपूर्वी फणसवळे येथील सड्यावर प्लास्टिक पिशवीत गुंडाळून जनावरांचे अवशेष टाकल्याचा प्रकार उघडकीला आला होता. तीन ते चार जनावरांचे हे अवशेष असल्याचा संशय आहे. मात्र, अद्यापही हे अवशेष टाकणाऱ्याचा शोध पोलिसांना लागलेला नाही. हे अवशेष कोणी टाकले, याचा उलगडा झालेला नाही.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
