लोटे, ता. खेड : यंदा पावसाने ओढ दिल्याने वाशिष्ठी नदीतील पाणीपातळी लक्षणीयरीत्या खालावली आहे. परिणामी लोटे एमआयडीसीला होणारा पाणीपुरवठा विस्कळीत झाला असून त्याचा फटका परिसरातील अनेक गावांच्या पाणी योजनांना बसत आहे. या गंभीर परिस्थितीमुळे अनेक गावांमध्ये भीषण पाणीटंचाई निर्माण झाली असताना लोटे येथील ‘श्री संत ज्ञानेश्वर माऊली जीवन मुक्ती धाम सेवा संस्था’ संचालित गोशाळेने सामाजिक बांधिलकी जपत नागरिकांना दिलासा दिला आहे.
लोटे येथील ही गोशाळा २००० च्या दशकापासून कार्यरत असून, ह.भ.प. भगवान कोकरे महाराज कीर्तन सेवेच्या माध्यमातून सुमारे ११०० गाईंचा सांभाळ करत आहेत. समाजसेवेचा वारसा जपत कोकरे महाराज यांनी पाणीटंचाईच्या संकटातही पुढाकार घेत ग्रामस्थांच्या मदतीसाठी हात पुढे केला.
पीरलोटे परिसरात पाण्याची तीव्र टंचाई निर्माण झाल्याने नागरिकांना मोठ्या अडचणींचा सामना करावा लागत होता. ही परिस्थिती लक्षात घेऊन कोकरे महाराज यांनी ग्रामपंचायतीच्या सहकार्याने गावाला विनामूल्य पाणी उपलब्ध करून देण्याचा निर्णय घेतला. ग्रामपंचायतीने स्थानिक नागरिकांच्या सहकार्याने टँकरची व्यवस्था केली, तर गोशाळेतील दोन विहिरी आणि एका बोरवेलमधील पाणी नागरिकांसाठी उपलब्ध करून देण्यात आले.
सरपंच चंद्रकांत चाळके, सचिन काते यांच्यासह ग्रामपंचायत ग्रामस्थांनी या उपक्रमाला सहकार्य केले.
या उपक्रमामुळे परिसरातील नागरिकांना मोठा दिलासा मिळाला असून, पिण्याच्या पाण्यासाठी होणारी धावपळ काही प्रमाणात कमी झाली आहे. पाणीटंचाईच्या कठीण काळात कोकरे महाराज आणि गोशाळा व्यवस्थापनाने केलेल्या या मदतीबद्दल ग्रामस्थांनी समाधान व्यक्त करत त्यांचे मनापासून आभार मानले आहेत.
सामाजिक जबाबदारीची जाणीव ठेवत गरजूंना मदतीचा हात देण्याची परंपरा कायम राखणाऱ्या कोकरे महाराजांच्या या कार्याचे सर्व स्तरांतून कौतुक होत आहे. पाणीटंचाईच्या संकटात दिलेला हा मदतीचा हात अनेकांसाठी जीवनदायी ठरत आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
