संगमेश्वर /प्रतिनिधी: दिनेश अंब्रे- संगमेश्वर तालुक्यातील कोंडअसुर्डे गावचे प्रतिष्ठित नागरिक आणि निवृत्त पोस्टमन जयप्रकाश गोपाळ शिंदे (वय ७८) यांचे १९ मार्च रोजी राहत्या घरी अल्पशा आजाराने निधन झाले. त्यांच्या जाण्याने परिसरात हळहळ व्यक्त होत आहे.
जयप्रकाश शिंदे यांनी कसबा पोस्ट कार्यालयात दीर्घकाळ सेवा बजावली होती. त्यांच्या उत्कृष्ट कामाची दखल घेऊन त्यांना ‘आदर्श पोस्टमन’ पुरस्काराने सन्मानित करण्यात आले होते. आपल्या सेवाकाळात त्यांनी अत्यंत प्रामाणिकपणे आणि आपुलकीने काम केले. निवृत्तीनंतरही ते सामाजिक कार्यात सक्रिय होते. ते संगमेश्वर संगम ज्येष्ठ नागरिक संघाचे क्रियाशील सदस्य होते.
एक उत्तम कबड्डीपटू म्हणूनही त्यांची ओळख होती. त्यांचा स्वभाव अत्यंत प्रेमळ आणि मनमिळावू असल्याने सर्व स्तरातील लोकांशी त्यांचे जिव्हाळ्याचे संबंध होते. त्यांच्या पश्चात पत्नी, दोन मुले, सुना आणि नातवंडे असा मोठा परिवार आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
