डोंबिवली- डोंबिवली शहरात गुढीपाडव्यानिमित्त काढण्यात आलेल्या नववर्ष स्वागतयात्रेचा उत्साह यंदा ओसंडून वाहत होता. यंदा या सांस्कृतिक परंपरेचे 28 वे वर्ष असून, शहराचा ऐतिहासिक वारसा जपण्याच्या उद्देशाने या भव्य उपक्रमाचे आयोजन करण्यात आले. श्री गणेश मंदिर संस्थानच्या माध्यमातून मार्गस्थ झालेल्या या स्वागतयात्रेत हजारो नागरिकांनी एकत्र येत हिंदू नववर्षाचे अत्यंत मंगलमयी वातावरणात स्वागत केले.
यंदाच्या या सोहळ्याचे सर्वात मोठे आकर्षण म्हणजे नेहरू मैदानात उभारलेली तब्बल 150 फुटांची महाकाय गुढी. भव्य आणि दिमाखदार स्वरूपात डौलाने उभी असलेली ही गुढी भारतीय संस्कृतीच्या विशालतेचे आणि सांस्कृतिक वैभवाचे प्रतीक ठरली. या महाकाय गुढीने केवळ नागरिकांचे लक्ष वेधून घेतले नाही, तर नववर्षाच्या प्रारंभाला एक नवा उत्साह आणि अभिमानास्पद उंची प्रदान केली.
या उपक्रमाबाबत बोलताना भाजप प्रदेशाध्यक्ष रवींद्र चव्हाण यांनी स्पष्ट केले की, तरुण पिढीला आपल्या समृद्ध भारतीय संस्कृतीशी जोडून ठेवण्यासाठी ही संकल्पना राबवण्यात आली आहे. या स्वागतयात्रेच्या यशाचे आणि सातत्याचे श्रेय त्यांनी आबासाहेब पटवारी आणि सुधीर जोगळेकर यांच्या दूरदृष्टीला दिले. सांस्कृतिक मूल्यांची जपणूक करणारा हा सोहळा खऱ्या अर्थाने हिंदुत्वाचा आणि परंपरेचा एक प्रभावी अविष्कार ठरला आहे.
यंदाच्या डोंबिवली स्वागतयात्रेत ‘वंदे मातरम्’ या राष्ट्रगानाचे 150 वे (शतकोत्तरी सुवर्णमहोत्सवी) वर्ष आणि राष्ट्रीय स्वयंसेवक संघाचे शताब्दी वर्ष या दोन ऐतिहासिक घटनांचे प्रतिबिंब प्रकर्षाने उमटले. या निमित्ताने ‘डोंबिवलीकर एक सांस्कृतिक परिवारा’तर्फे दोन भव्य आणि आशयघन चित्ररथ साकारण्यात आले होते. या चित्ररथांनी केवळ उपस्थितांचे लक्षच वेधले नाही, तर राष्ट्रभक्ती आणि सांस्कृतिक वारशाचा संदेश देत डोंबिवलीकरांकडून उत्स्फूर्त दादही मिळवली.
सांस्कृतिक परंपरेसोबतच राष्ट्रीय भावनेला उजाळा देण्यासाठी यंदा ‘क्रांतिकारी देशसेवक’ या संकल्पनेवर आधारित वेशभूषा स्पर्धा आयोजित करण्यात आली होती. 5 वर्षांच्या बालकांपासून ते 75 वर्षांच्या ज्येष्ठांपर्यंत सर्व वयोगटातील नागरिकांनी यात उत्साहाने सहभाग नोंदवत विविध क्रांतिकारकांच्या भूमिका जिवंत केल्या. या स्पर्धेतील विजेत्यांना 25,000 रुपये आणि उपविजेत्यांना 15,000 रुपयांची रोख पारितोषिके देऊन गौरविण्यात आले. अशा वैविध्यपूर्ण उपक्रमांमुळे यंदाची स्वागतयात्रा डोंबिवलीच्या परंपरेला राष्ट्रीय अस्मितेची जोड देणारी ठरली.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
