राजापूर मध्ये आमिष दाखवून शेकडो महिलांना लाखोंचा गंडा…

Spread the love

*राजापूर :-* रोजगाराचे आमिष दाखवून राजापूर तालुक्यातील शेकडो महिलांना लाखोंचा गंडा घातल्याचा धक्कादायक प्रकार समोर आला आहे. या फसवणुकीचे थेट ‘कनेक्शन’ कोल्हापूरपर्यंत असून, फसवणूक झालेल्या महिलांनी आता आक्रमक पवित्रा घेतला आहे. उद्योगासाठी महिलांच्या नावावर कर्ज काढून ते थेट कोल्हापुरातील संस्थेच्या खात्यात जमा केल्याचे महिलांचे म्हणणे आहे. त्याचबरोबर एका अग्रणी बँकेचीही फसवणूक झाल्याचे उघड झाले आहे.

याबाबत फसवणूक झालेल्या महिलांनी प्रसार माध्यमांना फसवणुकीची माहिती दिली. कच्चा माल आणि शिलाई मशीन देण्याचे खोटे आश्वासन देऊन महिलांच्या नावावर बँकेतून मोठ्या रकमेची कर्जे काढण्यात आली. मात्र, कर्जाची ही रक्कम कोल्हापुरातील एका संस्थेच्या खात्यात जमा करण्यात आल्याचे पुढे आले आहे. त्याचबरोबर २० हजारांची मशीन एक लाखाला दाखवून बँकेचीही फसवणूक केल्याचे महिलांनी सांगितले. बँकेतून कर्ज प्रकरणे मंजूर झाल्यानंतर पैसे घेणाऱ्या महिलांनी हप्ते भरण्यास टाळाटाळ केली. त्यामुळे आता हे कर्ज घेणाऱ्या महिलांकडे बँकांनी हप्त्यासाठी तगादा लावला आहे. त्यामुळे या महिला हवालदिल झाल्या आहेत.

महिलांनी व्यवसायासाठी मुद्रा कर्ज, सोने तारण कर्ज काढले आहे. मात्र, हप्ते थकल्याने आता दागिनेही लिलावात जाण्याची वेळ आली आहे.

फसवणूक झालेल्या एका महिलेने आत्मदहनाचा इशारा दिला आहे. काही अघटित घडल्यास दोन्ही महिला जबाबदार असतील, असेही या महिलेने पत्रकारांशी बोलताना सांगितले .

कोल्हापूर येथील संस्थेने राजापुरातील एका स्थानिक महिलेला आपल्या हाताशी धरून महिला बचत गटातील महिलांशी संपर्क साधला. त्यानंतर या महिलांना रोजगाराचे प्रलोभन दाखवून त्यांच्या नावावर कर्ज घेण्यात आल्याचे फसवणूक झालेल्या महिलांचे म्हणणे आहे. या संपूर्ण प्रक्रियेत स्थानिक महिला सहभागी असल्याचा आरोपही महिलांनी केला आहे.

या फसवणुकीबाबत डिसेंबर महिन्यात सर्व महिला पोलिस स्थानकावर धडकल्या होत्या. मात्र, त्यानंतरही कार्यवाही झालेली नाही. त्यामुळे या महिलांनी २६ जानेवारीपासून बेमुदत उपोषण करण्याचा इशारा दिला आहे.

राजापुरातील एका अग्रणी बँकेतून महिलांना व्यवसायासाठी कर्ज मिळवून देण्यात आले. हे कर्ज मिळवून देण्यातही स्थानिक महिला सक्रिय होती. व्यवसाय करणाऱ्या महिलांना बँकेतून कर्ज देण्यात आले. मात्र, हे कर्ज महिलांच्या खात्यात जमा न होता संस्थेच्या खात्यात जमा झाल्याचे महिलांनी सांगितले .

१३ तारखेपर्यंत तुम्ही साडेतीन हजार भरा, असे बँकेने सांगितले होते. आठ हजारांच्या वर माझी रक्कम झाली आहे. लाडक्या बहिणीचे जमा झालेल्या पैशातून सहा हप्ते कापून घेतले आहेत, असे एका महिलेने सांगितले.

🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥