मुंबई– दिल्लीचे मुख्यमंत्री अरविंद केजरीवाल आणि पंजाबचे मुख्यमंत्री भगवंत मान हे कालपासून मुंबई दौऱ्यावर आहेत.केंद्र सरकारने काढलेल्या अधिकाऱ्यांच्या बदली संदर्भातील अध्यादेशाविरोधात अरविंद केजरीवाल हे देशात भाजप विरोधकांच्या भेटी घेत आहेत. नितीश कुमार, बंगालच्या मुख्यमंत्री ममता बॅनर्जी यांची भेट घेतल्यानंतर काल त्यांनी मातोश्रीवर उद्धव ठाकरे यांची भेट घेतली व आज ते शरद पवारांच्या भेटीसाठी यशवंतराव चव्हाण सेंटरमध्ये उपस्थित होते.
यावेळी विधानसभेचे विरोधी पक्षनेते अजित पवार यांनी केजरीवाल यांना पुष्पगुच्छ देऊन त्यांचे स्वागत केले. यावेळी राष्ट्रवादीचे ज्येष्ठ नेते दिलीप वळसे-पाटील, छगन भुजबळ आणि सुनिल तटकरे आदी उपस्थित होते. दिल्लीबाबत केंद्राने काढलेला अध्यादेश रद्द व्हावा व संसदेत त्याला विरोध करण्यात यावा यासाठी अरविंद केजरीवाल यांनी आज शरद पवारांची भेट घेतली व या अध्यादेशाला विरोध करावा अशी विनंती केली.
दिल्लीबाबत केंद्राने काढलेला अध्यादेश नेमका काय आहे?
दिल्लीमध्ये अधिकाऱ्यांच्या पोस्टिंगमध्ये राज्य सरकारलाही वाव देणारा आदेश सुप्रीम कोर्टाच्या घटनापीठानं ११ मे रोजी दिला होता. पण केंद्र सरकारने अवघ्या आठ दिवसात अध्यादेश आणत हा निकालच रद्दबातल केला. दिल्ली हे पूर्ण राज्य नाही. त्यामुळे इथे केंद्रच सुप्रीम असलं पाहिजे असं म्हणत या केंद्राने या अध्यादेशात सगळे अधिकार पुन्हा उपराज्यपालांकडे दिले आहेत.
आता कुठलाही अध्यादेश काढल्यानंतर तो सहा महिन्यांत संसदेत मंजूर करुन घ्यावा लागतो आणि अवघ्या काही दिवसांवर पावसाळी अधिवेशन आल्याने हा अध्यादेश संसदेत पारित करण्यासाठी सर्व खासदारांसमोर ठेवण्यात येणार आहे.हा अध्यादेश पारित होऊ नये,तसंच याला विरोध व्हावा यासाठी अरविंद केजरीवालांनी देशातील भाजप विरोधकांच्या गाठीभेटी घेण्यासाठी सुरूवात केली आहे.याच धर्तीवर काल त्यांनी उद्धव ठाकरे यांची भेट घेतली आणि आज त्यांनी शरद पवारांची भेटी घेतली आहे.
