सांस्कृतिक कार्य मंत्री सुधीर मुनगंटीवार यांनी केले अभिनंदन…
जनशक्तीचा दबाव न्यूज | मुंबई | फेब्रुवारी १, २०२३.
यंदाच्या प्रजासत्ताक दिनानिमित्त नवी दिल्ली येथे झालेल्या चित्ररथ संचलनात महाराष्ट्राला चित्ररथाबद्दल दोन पारितोषिके तर सांस्कृतिक कार्यक्रमाबद्दल एक पारितोषिक अशी एकूण तीन पारितोषिके प्राप्त झाली आहेत.
सर्वोत्कृष्ट चित्ररथमध्ये दुसरा क्रमांक, लोकप्रिय चित्ररथमध्ये तिसरा क्रमांक आणि आंतरराज्य सांस्कृतिक कार्यक्रम स्पर्धेमध्ये दुसरा क्रमांक, अशी महाराष्ट्राने पारितोषिके प्राप्त केली आहेत. दिल्ली येथे आज संरक्षण राज्यमंत्री अजय भट यांच्या हस्ते पारितोषिक विजेत्या राज्यांचा मानचिन्ह देऊन सत्कार करण्यात आला. महाराष्ट्र शासनाच्या वतीने सांस्कृतिक कार्य संचालक विभीषण चवरे यांनी ही पारितोषिके स्वीकारली.
यंदाच्या वर्षी प्रजासत्ताक दिनानिमित्त महाराष्ट्राने साडेतीन शक्तीपीठे आणि नारीशक्ती या विषयावर चित्ररथ साकारला होता. अप्रतिम देखावे, सुंदर नृत्य आणि सर्वांग सुंदर गीत यामुळे या चित्ररथाने अनेकांची मने जिंकली होती.
संरक्षण मंत्रालयाच्या निवड समितीतील सदस्यांनी या चित्ररथास सर्वोत्कृष्ट चित्ररथ मध्ये दुसरा क्रमांक देऊन गौरव केला, तर लोकप्रिय चित्ररथ मध्येही महाराष्ट्राने तिसरा क्रमांक पटकावला. आंतरराज्यीय सांस्कृतिक कार्यक्रम स्पर्धेत महाराष्ट्राच्या पथकाने धनगर नृत्य यावर आधारित सादरीकरण केले होते. या सादरीकरणास देशात दुसरा क्रमांक मिळाला होता.
महाराष्ट्राला मिळालेल्या या यशाबद्दल सांस्कृतिक कार्य मंत्री सुधीर मुनगंटीवार यांनी सर्व कलावंतांचे अभिनंदन केले आहे. तीनही श्रेणीमध्ये तीन पुरस्कार मिळणे ही गोष्ट महाराष्ट्राला अभिमानास्पद असल्याचेही मंत्री सुधीर मुनगंटीवार यांनी सांगितले.
