मुंबई- कोकण, मध्य महाराष्ट्रात १३ जुलैपर्यंत मुसळधार पावसाचा अंदाज पुणे वेधशाळेने व्यक्त केला आहे. तसेच मराठवाडा आणि विदर्भात ९ जुलैनंतर पावसाचा जोर असणार आहे. त्यानंतर पाऊस कमी होणार आहे. यंदा राज्यात मराठवाडा आणि विदर्भ वगळता सर्वत्र पावसाने सरासरी गाठली आहे. कोकणात ७ जुलैपर्यंत १०३ टक्के पाऊस झाला आहे.
राज्यातील कोकण भागासह, काही ठिकाणी मान्सूनचा जोर वाढत चालला आहे. मराठवाड्यातील छत्रपती संभाजीनगरसह 6 जिल्ह्यांना सतर्कतेचा यलो अलर्ट हवामान विभागाने जारी केला आहे. तर 2 जिल्ह्यात विजांच्या कडकडाटासह हलका ते मध्यम पावसाची शक्यता वर्तवण्यात आली आहे. छत्रपती संभाजीनगरसह जालना, परभणी, बीड, हिंगोली आणि नांदेड या 6 जिल्ह्यात आज 8 जुलै रोजी हवामान विभागाने यलो अलर्ट जारी केला असून या जिल्ह्यांत जोरदार पावसाची शक्यता वर्तवण्यात आली आहे. या काळात छत्रपती संभाजीनगर, जालना, परभणी आणि बीड जिल्ह्यात 30 ते 40 किमी तासी वेगाने वारे वाहतील.
मराठवाड्यात आज सोसाट्याचा वारा आणि विजांच्या कडकडाटात हलका ते मध्यम स्वरूपाचा पाऊस होईल. हिंगोली आणि नांदेड जिल्ह्यात 40 ते 50 किमी तासी वेगाने वारे वाहतील. उर्वरित 2 जिल्ह्यांपैकी लातूरमध्ये मध्यम पाऊस राहील. तर धाराशिवमध्ये हलका ते मध्यम पावसाची शक्यता असून कोणताही सतर्कतेचा अलर्ट दिलेला नाही. दरम्यान, बदलत्या हवामानाचा फटका मराठवाड्यातील शेतकऱ्यांना सर्वाधिक बसला आहे. यंदा मे महिन्यात झालेल्या वादळी पावसाने शेतकऱ्यांचे मोठे नुकसान झाले. तर जूनमध्ये पावसाने ओढ दिल्याने खरीप पेरण्या संकटात सापडल्या. आता पुन्हा पाऊस सुरू झाल्याने शेतकऱ्यांना दिलासा मिळाला आहे. मात्र, पावासाने संपूर्ण महाराष्ट्रात चांगली हजेरी लावलेली नाही. त्यामुळे शेतकऱ्यांतून चिंता व्यक्त होत आहे.
