मंडणगड(प्रतिनिधी) : सावित्रीबाई फुले शिक्षण प्रसारक मंडळाचे लोकनेते गोपीनाथजी मुंडे कला, वाणिज्य व विज्ञान महाविद्यालयात गुणवत्ता हमी कक्षा अंतर्गत सांस्कृतिक विभागाच्या वतीने कर्मवीर भाऊराव पाटील यांची जयंती उत्साहात साजरी करण्यात आली. कार्यक्रमाच्या अध्यक्षस्थानी महाविद्यालयाचे प्रभारी प्राचार्य डॉ. वाल्मिक परहर होते. यावेळी उपप्राचार्य डॉ. विष्णु जायभाये, डॉ. अशोक साळुंखे, प्रा. हनुमंत सुतार, डॉ. मुकेश कदम, डॉ. शैलेश भैसारे, ग्रंथपाल डॉ. दगडू जगताप आदी मान्यवर उपस्थित होते.
कार्यक्रमाच्या सुरुवातीला प्रभारी प्राचार्य डॉ.वाल्मिक परहर व उपप्राचार्य डॉ. विष्णु जायभाये यांच्या हस्ते कर्मवीर भाऊराव पाटील यांच्या प्रतिमेस पुष्पहार अर्पण करुन अभिवादन करण्यात आले.
यावेळी बोलताना डॉ. वाल्मिक परहर म्हणाले, कर्मवीर भाऊराव पाटील यांचे शिक्षण जरी बेताचेच असले तरी बहुजन समाजाला शिक्षण देण्याची प्रचंड तळमळ त्यांना होती. त्यांनी शिक्षणक्षेत्रातील विशिष्ट वर्गाची मक्तेदारी मोडीत काढून दुर्लक्षित व बहुजन समाजाला शिक्षण मिळावे यासाठी आयुष्यभर झपाटल्यासारखे काम केले. ‘कमवा व शिका’ ही स्वावलांबनाची संकल्पना राबवून शिक्षणक्षेत्रात कर्मवीर भाऊराव पाटील यांनी क्रांतिकारक पाऊल टाकले. कर्मवीर अण्णांनी लावलेले रयत शिक्षण संस्थेचे छोटेसे रोपटे आज समाजाला ज्ञान, स्वाभिमान आणि समृध्दी देणारे विशाल वटवृक्ष बनले आहे. म्हणून आजही त्यांचे कार्य समाजासाठी प्रेरणादायी व उल्लेखनीय आहे.
सदर कार्यक्रमास शिक्षक-शिक्षकेतर कर्मचारी व विद्यार्थी उपस्थित होते. शेवटी उपस्थित सर्वांचे आभार डॉ. अशोक साळुंखे यांनी मानले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
