शिमला- हिमाचल प्रदेशमधून भाजपचे हर्ष महाजन राज्यसभेवर विजयी झाले आहेत. विधानसभेत बहुमत असूनही काँग्रेसचे अभिषेक मनू सिंघवी यांचा पराभव झाला. मतदानात दोघांना 34-34 मते मिळाली. त्यानंतर लॉटरीद्वारे भाजपच्या उमेदवाराला विजयी घोषित करण्यात आले.
त्याचवेळी 9 आमदारांच्या क्रॉस व्होटिंगमुळे मुख्यमंत्री सुखविंदर सुखू यांच्या नेतृत्वाखालील काँग्रेस सरकार संकटात सापडले आहे. हिमाचलमध्ये 6 काँग्रेस आणि 3 अपक्ष आमदारांनी भाजपच्या बाजूने क्रॉस व्होट केले.
क्रॉस व्होट करणाऱ्यांमध्ये सुजानपूरमधून काँग्रेसचे राजेंद्र राणा, धर्मशालामधून सुधीर शर्मा, कुतलाहारमधून देवेंद्र भुट्टो, बडसरमधून आयडी लखनपाल, लाहौल-स्पीतीमधून रवी ठाकूर आणि गाग्रेटमधून चैतन्य शर्मा यांचा समावेश आहे. मतदानापूर्वी हे सर्वजण सकाळी एकाच वाहनातून विधानसभेत पोहोचले. विधानसभेच्या बाहेर गाडीतून खाली उतरताच भाजपचे आमदार बिक्रम ठाकूर आणि राकेश जामवाल यांनी त्यांची भेट घेतली. हमीरपूरचे 3 अपक्ष आमदार आशिष शर्मा, देहराचे होशियार सिंह आणि नालागढचे केएल ठाकूर यांनीही भाजपचे उमेदवार हर्ष महाजन यांना मतदान केले. मतदानानंतर या सर्व 9 आमदारांना CRPF सुरक्षा देण्यात आली होती. त्यानंतर सर्वजण पंचकुला येथील विश्रामगृहावर पोहोचले. राज्यसभा निवडणुकीत सर्व 68 आमदारांनी मतदान केले.
सर्व 9 आमदार पंचकुला येथे पोहोचले…
सूत्रांनी दिलेल्या माहितीनुसार, क्रॉस व्होटिंगचा संशय असलेले सर्व 9 आमदार पंचकुला येथे पोहोचले आहेत. हरियाणात भाजपचे सरकार आहे.
मतमोजणी पूर्ण झाली पण एका आमदारामुळे अडचण…
मतमोजणी पूर्ण झाली आहे. मात्र काँग्रेसचे आमदार सुदर्शन बबलू यांच्या मतामुळे घोडे अडले आहे.
माजी मुख्यमंत्र्यांनी आमदारांच्या मतावर प्रश्न उपस्थित केले…
भाजपचे विरोधी पक्षनेते जयराम ठाकूर यांनी सुदर्शन बबलू यांच्या मतावर प्रश्न उपस्थित केले. ते म्हणाले की, मुख्यमंत्री सखू यांनी सुदर्शन बबलू यांना होशियारपूरहून सरकारी हेलिकॉप्टरमधून सिमला येथे आणले आणि मुख्यमंत्री स्वत: शिमल्यात त्यांचे स्वागत करण्यासाठी गेले. हे निवडणूक आचारसंहितेचे उघड उल्लंघन आहे.
सिंघवी हरल्यास लोकसभेपूर्वी मुख्यमंत्री आणि पक्षासाठी हा मोठा धक्का असेल..
हिमाचल विधानसभेत एकूण 68 जागा आहेत. नोव्हेंबर-2022 मध्ये विधानसभा निवडणुकीसाठी मतदान झाले आणि निवडणुकीचे निकाल 8 डिसेंबर 2022 रोजी आले. यामध्ये काँग्रेसला 40 तर भाजपला 25 जागा मिळाल्या आहेत. अपक्ष आमदारांनी 3 जागा जिंकल्या.
हिमाचलमधील एक राज्यसभेची जागा भाजपचे राष्ट्रीय अध्यक्ष जेपी नड्डा यांचा एप्रिलमध्ये कार्यकाळ पूर्ण झाल्यामुळे रिक्त होत आहे. येथे राज्यसभा निवडणूक जिंकण्यासाठी किमान 35 आमदारांची मते आवश्यक आहेत.
विधानसभेत काँग्रेसकडे पूर्ण बहुमत असल्याने आणि राज्यसभेच्या जागेवर त्यांच्या उमेदवाराचा विजय निश्चित असल्याने पक्षाने सर्वोच्च न्यायालयाचे ज्येष्ठ वकील अभिषेक मनु सिंघवी यांना उमेदवारी दिली. 10 आमदारांची संख्या कमी असतानाही, भाजपने वीरभद्र सिंह यांच्या जवळचे आणि काँग्रेस सोडलेल्या हर्ष महाजन यांना उमेदवारी दिल्याने स्थिती रंजक झाली.
आता पूर्ण बहुमत असूनही काँग्रेसचे अभिषेक मनु सिंघवी यांचा पराभव झाला तर लोकसभा निवडणुकीपूर्वी मुख्यमंत्री सुखविंदर सिंग सुखू आणि पक्ष या दोघांसाठी हा मोठा धक्का असेल.
मुख्यमंत्र्यांच्या कार्यशैलीवर काँग्रेस आमदार नाराज आहेत…
हिमाचल विधानसभा निवडणुकीत पक्षाला पूर्ण बहुमत मिळाल्यानंतर काँग्रेस हायकमांडने माजी मुख्यमंत्री स्व. वीरभद्र सिंग यांच्या गटाकडे दुर्लक्ष करून लोअर हिमाचलमधून आलेल्या सुखविंदर सिंग सुखू यांना मुख्यमंत्री करण्यात आले. अवघ्या दीड वर्षात मुख्यमंत्र्यांच्या कार्यशैलीवर काँग्रेसचे अनेक आमदार नाराज असून त्यांनी उघडपणे मुख्यमंत्र्यांविरोधात आघाडी उघडली आहे.
भाजप उमेदवार म्हणाले- सत्ताधारी घाबरले आहेत, माझा विजय निश्चित आहे..
राज्यसभा निवडणुकीत भाजपने उमेदवारी दिलेले हर्ष महाजन हे माजी मुख्यमंत्री वीरभद्र सिंह यांच्या जवळचे आहेत. काँग्रेसमध्ये 40 वर्षे घालवलेल्या महाजन यांनी 2022 मध्ये पक्ष सोडला आणि भाजपमध्ये प्रवेश केला. काँग्रेसचे अनेक आमदार त्यांचे मित्र आहेत.
मंगळवारी राज्यसभा निवडणुकीचे मतदान पूर्ण झाल्यानंतर महाजन म्हणाले की, सत्ताधारी ज्या प्रकारे घाबरले आहेत, ते पाहता मला माझ्या विजयाचा विश्वास वाटतो.
सरकार पडणार असल्याचा दावा महाजन यांनी केला..
हिमाचलमधील सुखविंदर सिंग सुखू यांच्या नेतृत्वाखालील काँग्रेस सरकार लवकरच पडेल, असा दावाही हर्ष महाजन यांनी केला. ते म्हणाले की, काँग्रेस सरकारसाठी अवघे काही दिवस उरले आहेत. महाजन यांनी मुख्यमंत्री सुखविंदर सिंग सखू यांना घेरले.
काँग्रेस आमदारांच्या क्रॉस व्होटिंगचे कारण
सुजानपूरचे आमदार राजेंद्र राणा आणि धर्मशालाचे आमदार सुधीर शर्मा स्वतःला मंत्री न केल्याने संतापले आहेत. दोघेही उघडपणे सरकार आणि मुख्यमंत्र्यांवर निशाणा साधत आहेत. राणा यांनी उघडपणे भाजपमध्ये येण्याचे संकेत दिले आहेत.
सखू सरकारच्या 14 महिन्यांच्या कार्यकाळात वीरभद्र गटाच्या नेत्यांचे पूर्णपणे दुर्लक्ष झाले. वीरभद्र सिंह यांच्या पत्नी आणि हिमाचल प्रदेश काँग्रेसच्या अध्यक्षा प्रतिभा सिंह यांनी हा मुद्दा अनेकवेळा पार्टी हायकमांड आणि मुख्यमंत्र्यांकडे मांडला आहे.
काँग्रेसचे उमेदवार अभिषेक मनु सिंघवी हे बिगर हिमाचली असल्याचे भाजपने कार्ड खेळले. त्यांच्या जागी मूळचे हिमाचलचे हर्ष महाजन यांना मतदान करण्याचे आवाहन पक्षाने केले आहे. सिंघवी यांनी हिमाचलशी संबंधित खटल्यात विरोधी पक्षाची बाजू मांडणे हाही मुद्दा बनवण्यात आला.
