साखरपा- रत्नागिरी-कोल्हापूर महामार्गावरील वाहतुकीसाठी अत्यंत महत्त्वाच्या आणि तितक्याच आव्हानात्मक असलेल्या आंबा घाटात आज एक दुर्घटना टळली. घाटातील गणेश मंदिर परिसरात आज सकाळी अचानक एक भलामोठा दगड रस्त्याच्या मधोमध येऊन कोसळला. मात्र, कर्तव्यावर असलेल्या पोलीस पथकाने आणि सांगलीहून फिरण्यासाठी आलेल्या काही सुजाण तरुणांनी दाखवलेल्या तत्परतेमुळे हा रस्ता वाहतुकीसाठी तात्काळ मोकळा करण्यात यश आले आहे.
आंबा घाटातील गणेश मंदिराच्या जवळ आज सकाळी अचानक डोंगरावरून एक प्रचंड मोठा दगड थेट मुख्य रस्त्याच्या मधोमध येऊन पडला. घाटातील वळणावर हा दगड पडल्याने मोठा अपघात होण्याची आणि दोन्ही बाजूंची वाहतूक ठप्प होण्याची दाट शक्यता निर्माण झाली होती. परिस्थितीचे गांभीर्य ओळखून आंबा घाट टीमचे पोलीस कर्मचारी पीसी/७७३ प्रताप वाकरे, पीसी/७५७ भीम कोळी, पीसी/३६४ रोहित मांगले आणि चालक पीसी/रिलेश कांबळे यांनी तात्काळ घटनास्थळी धाव घेतली. दगड प्रचंड मोठा असल्याने तो बाजूला करणे एकट्या-दुकट्याचे काम नव्हते. त्याच वेळी सांगली जिल्ह्यातील तासगाव येथून रत्नागिरी परिसरात पर्यटनासाठी आलेली काही तरुण मुले तिथून जात होती.
रस्त्यावरील अडथळा आणि पोलिसांचे प्रयत्न पाहून या तरुणांनी कोणतीही दिरंगाई न करता गाडी थांबवली आणि मदतीचा हात पुढे केला. ’अशक्य ते शक्य’ करत आंबा घाट पोलीस टीम आणि तासगावच्या धाडसी तरुणांनी मिळून संपूर्ण ताकद लावली आणि तो भलामोठा दगड रस्त्याच्या कडेला ढकलला. पाऊस आणि घाटातील आव्हानात्मक हवामान असतानाही या सर्वांनी दाखवलेल्या या तत्परतेमुळे महामार्गावरील वाहतूक पुन्हा एकदा सुरळीत झाली. धावून आलेल्या या ‘देवदूतांमुळे’ मोठा अनर्थ टळल्याने, घाटातून प्रवास करणाऱ्या इतर प्रवाशांनी पोलीस प्रशासन आणि सांगलीच्या या पर्यटकांचे मनःपूर्वक आभार मानले असून त्यांच्यावर कौतुकाचा वर्षाव होत आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
