मुंबई :-शिवसेना ठाकरे गटाकडून धारावीमध्ये मोर्चा काढण्यात आला. अदानी ग्रुपकडून करण्यात येणाऱ्या धारावी पुनर्विकास प्रकल्पाच्या विरोधात शिवसेनेने आक्रमक पाऊल उचलले आहे. ‘अदानी हटाओ धारावी बचाओ’ असा नारा देत कार्यकर्ते या मोर्चामध्ये सामील होत आहेत. या मोर्चासाठी उद्धव ठाकरे, संजय राऊत, अंबादास दानवे, आदित्य ठाकरे यांच्यासह ठाकरे गटाचे विविध नेते सामील झालेले आहेत.
या संदर्भाने भाजपा नेते नारायण राणे यांनी उद्धव ठाकरे यांच्यावर निशाणा साधला आहे.
भाजप नेते नारायण राणे यांनी आपल्या ‘X’ खात्यावर पोस्ट करत ठाकरे गट धारावीमध्ये काढत असलेल्या मोर्चाच्या पार्श्वभूमीवर उद्धव ठाकरे यांच्यावर निशाणा साधला आहे, राणे यांनी त्यांच्या पोस्टमध्ये म्हटलं आहे की, “उध्‍दव ठाकरे व त्यांच्या नादी लागून कॉंग्रेस व इतर पक्ष अदानी उद्योग समुहाविरोधात आता धारावीमध्ये मोर्चा काढताहेत.
दुसरीकडे उध्‍दव ठाकरेंचे बगलबच्‍चे आदरणीय साहेबांच्‍या जीवावर उठलेल्‍या पाकिस्‍तानातील दाऊदच्‍या साथीदाराबरोबर पार्टीमध्‍ये नाचत आहेत. वा रे उध्‍दव ठाकरे ! मुख्‍यमंत्री असताना अडीच वर्षात धारावीकरांना उध्‍दव ठाकरे पाचशे चौरस फुटांचे घर देण्‍याचा निर्णय घेऊ शकले नाहीत. आता त्‍यासाठी मोर्चा. सत्‍तेत असताना अडीच वर्षात तुम्‍ही का नाही दिले धारावीकरांना पाचशे चौरस फुटांचे घर ? यांचे प्रेम धारावी आणि धारावीकरांवर नाही. यांचे खरे प्रेम टी. डी. आर. च्‍या मलईवर आहे. उध्‍दव ठाकरे यांना ना नीती, ना नितीमत्‍ता ! स्‍वार्थासाठी काही पण !!
