🔴 कोरोनाची दहशत वाढली ! ७ दिवसांत ७८ टक्के प्रकरणे, मृत्यू संख्येतही वाढ

Spread the love

नवी दिल्ली l 27 मार्च-

देशात कोरोनाबाधित रुग्णांचा आकडा आणि मृत्यूची संख्या झपाट्याने वाढत आहे. गेल्या शनिवारी कोरोना विषाणूची १८९० नवीन प्रकरणे नोंदवली गेली, जी गेल्या २१० दिवसांतील सर्वाधिक आहे. गेल्या सात दिवसांतील प्रकरणांची तुलना केल्यास, कोरोना विषाणूच्या प्रकरणांमध्ये ७८ टक्क्यांनी वाढ झाली आहे, तर या कालावधीत १९ वरून २९ मृत्यूची नोंद झाली आहे.

टाइम्स ऑफ इंडियाने दिलेल्या रिपोर्टनुसार, गेल्या सात दिवसांत (१९ – २५ मार्च) भारतात कोरोना विषाणूची ८,७८१ नवीन प्रकरणे नोंदली गेली आहेत, जी मागील सात दिवसांतील ४,९२९ पेक्षा ७८ टक्के जास्त आहे. गेल्या सहा आठवड्यांपासून देशात कोरोनाचा संसर्ग वाढत आहे. देशातील दैनंदिन प्रकरणे आठ दिवसांत दुप्पट होत आहेत. रोजच्या प्रकरणांची सात दिवसांची सरासरी शनिवारपर्यंत १,२५४ वर पोहोचली होती, जी आठ दिवस आधी (१७ मार्च) ६२६ होती.

याचबरोबर, सलग दुसऱ्या आठवड्यात महाराष्ट्रात गेल्या सात दिवसांत देशात सर्वाधिक नवीन रुग्णांची नोंद झाली आहे. १९ ते २५ मार्च दरम्यान महाराष्ट्रात कोरोनाची १,९५६ प्रकरणे नोंद झाली आहेत. १२ मार्च ते १९ मार्च या कालावधीत १,१६५ प्रकरणे समोर आली आहेत. जी आता ६८ टक्के अधिक आहे. बहुतेक राज्यांमध्ये कोरोना रुग्णांची संख्या वाढली आहे. यामध्ये हरयाणा, दिल्ली, यूपी, गुजरात, हिमाचल आणि गोवा यांचा समावेश आहे.

रविवारी दिल्लीत कोरोनाची १५३ नवीन प्रकरणे नोंदवण्यात आली. यादरम्यान कोरोनाचा संसर्ग दर ९.१३ टक्क्यांवर पोहोचला आहे. आरोग्य विभागाने दिलेल्या आकडेवारीवरून ही माहिती मिळाली आहे.

आरोग्य विभागाच्या आकडेवारीनुसार, शनिवारी दिल्लीत ४.९८ टक्के कोरोना संसर्ग दरासह १३९ प्रकरणे नोंदवली गेली. शुक्रवारी ६.६६ टक्के संसर्ग दरासह १५२ प्रकरणे नोंदवली गेली, तर गुरुवारी ४.९५ टक्के संसर्ग दरासह ११७ प्रकरणे नोंदवली गेली. तसेच, राष्ट्रीय राजधानीत गेल्या ऑक्टोबरमध्ये तीन अंकी प्रकरणांची नोंद झाली.