*नवी दिल्ली :* राष्ट्रवादी काँग्रेसच्या खासदार सुप्रिया सुळे यांच्या कन्या रेवती सुळे यांच्या विवाह सोहळ्यात आणि रिसेप्शनमध्ये देशातील अव्वल राजकीय नेत्यांची मांदियाळी पाहायला मिळाली. या सोहळ्यात शरद पवार यांच्या शेजारी बसलेल्या पंतप्रधान नरेंद्र मोदी यांच्याशी एक तरुण अतिशय आत्मविश्वासाने चर्चा करताना आणि आपल्या मोबाईलमधील माहिती दाखवताना दिसला. पंतप्रधान मोदीही त्याचे म्हणणे अत्यंत लक्षपूर्वक ऐकत होते. सोशल मीडियावर हा तरुण नेमका कोण, याबाबत मोठी उत्सुकता निर्माण झाली . पंतप्रधान मोदींशी थेट संवाद साधणारा हा तरुण दुसरा तिसरा कोणी नसून ‘भारताचे जॅकफ्रूट किंग’ म्हणून ओळखले जाणारे महाराष्ट्रातील रत्नागिरीचे युवा शेतकरी आणि उद्योजक मिथिलेश देसाई आहेत. शरद पवार यांनी रत्नागिरीतील तरुण शेतकरी मिथिलेश देसाई यांची पंतप्रधान नरेंद्र मोदी यांच्याशी भेट घडवून आणली.
*कोण आहेत मिथिलेश देसाई ?*
मिथिलेश देसाई हे महाराष्ट्रातील रत्नागिरी जिल्ह्यातील लांजा तालुक्यातील झापाडे गावचे रहिवासी आहेत. त्यांनी महात्मा फुले कृषी विद्यापीठ (राहुरी) येथून ॲग्रिकल्चरल इंजिनिअरिंगमध्ये बी.टेक पदवी घेतली आहे. पदवीनंतर त्यांनी दिल्लीत राहून UPSC ची तयारी केली. २०१६ मध्ये दुसऱ्या प्रयत्नात त्यांनी मुलाखतीपर्यंत मजल मारली होती. मात्र, अंतिम निवड न झाल्याने त्यांनी प्रशासकीय सेवेपेक्षा कृषी क्षेत्रातच काहीतरी वेगळे करण्याचा निर्णय घेतला आणि यूपीएससीची तयारी सोडून आपल्या वडिलांच्या फणस शेती व्यवसायात स्वतःला झोकून दिले.
मिथिलेश यांचे वडील हरिश्चंद्र देसाई यांनी २००० च्या सुमारास केरळमधून विविध जातींची कलमे आणून फणसाची लागवड सुरू केली होती. मिथिलेश यांनी या पारंपरिक शेतीला विज्ञानाची आणि संशोधनाची जोड दिली.
त्यांनी आपल्या सुमारे २८ एकर शेतीत जगभरातील फणसाच्या ८६ हून अधिक जातींची यशस्वी लागवड केली आहे. यामध्ये लाल, केशरी, पिवळ्या, द्विवार्षिक फळ देणाऱ्या आणि कुंडीतही येणाऱ्या फणसांच्या जातींचा समावेश आहे.
मिथिलेश यांनी २०२० मध्ये ‘जॅकफ्रूटकिंग ॲग्रो प्रोड्युसर कंपनी लिमिटेड’ ची स्थापना केली. ही कंपनी फणसापासून वीगन मीट, बर्गर पॅटीज, चिप्स, मधुमेहावर उपयुक्त पावडर आणि जनावरांचा चारा यांसारखी विविध उत्पादने तयार करते.
त्यांच्या रोपवाटिकेतून दरवर्षी सुमारे २५,००० कलमी रोपांची विक्री होते आणि ९०० हून अधिक शेतकरी त्यांच्याशी जोडले गेले आहेत. कॅन्सरच्या संशोधनासाठी त्यांच्या बागेतील फणसाची पाने थेट जर्मनीला पाठवली जातात, तर मॉरिशससारख्या देशांमध्ये रोपांची निर्यात केली जाते. आज त्यांच्या कंपनीची वार्षिक उलाढाल सुमारे ९५ लाख ते १ कोटी रुपयांच्या घरात पोहोचली आहे.
*पंतप्रधान मोदींशी काय झाली चर्चा ?*
रिसेप्शनदरम्यान मिथिलेश देसाई हे पंतप्रधान मोदींना फणसावरील प्रक्रिया उद्योग, फालसा फळावरील प्रयोग आणि कृषी क्षेत्रातील नवीन प्रयोगांविषयीची कागदपत्रे व माहिती दाखवत होते. भारताच्या या ‘जॅकफ्रूट किंग’च्या कृषी क्षेत्रातील संशोधनाची आणि उपक्रमांची माहिती पंतप्रधान मोदींनी अत्यंत कुतूहलाने ऐकून घेतली.
*पंतप्रधान मोदींना काय काय दिले?*
पंतप्रधान मोदी यांच्या भेटीदरम्यान देसाई यांनी फणस आणि फणसापासून तयार केलेली विविध मूल्यवर्धित उत्पादने भेट दिली. यात फणस, मिल्कशेक आणि आईस्क्रीमसाठी वापरता येणारी कच्च्या गऱ्यांची पावडर, फणसाच्या आठळीची (बियांची) पावडर आणि फणसाचे गरे यांचा समावेश होता. तसेच फणसाच्या सालीपासून तयार केलेली बॅग आणि पासपोर्ट होल्डर ही उत्पादनेही त्यांनी मोदींना भेट दिली. फणसाच्या झाडाचा केवळ गरच नव्हे, तर साल, पाने आणि बियांचाही उपयोग करता येतो, हे या उत्पादनांच्या माध्यमातून दाखवण्याचा प्रयत्न असल्याचे मिथिलेश देसाई यांनी सांगितले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
