*खेड-* मुंबई-गोवा राष्ट्रीय महामार्गावरील खेड येथील जगबुडी नदी पुलावरून नदीत कोसळलेल्या कंटेनरमधील चालकाचा मृतदेह गुरुवारी राष्ट्रीय आपत्ती प्रतिसाद दलाच्या (एनडीआरएफ) जवानांनी बाहेर काढला. मुसळधार पाऊस, नदीला आलेला पूर आणि वेगवान प्रवाह यामुळे बचावकार्यात अनेक अडथळे निर्माण झाले होते.
बुधवारी सायंकाळी सुमारे ५.४५ वाजण्याच्या सुमारास गोव्याहून मुंबईच्या दिशेने मॅगीने भरलेला कंटेनर जात असताना चालकाचे वाहनावरील नियंत्रण सुटले. महामार्गावरील दोन पुलांच्या मधून कंटेनर थेट जगबुडी नदीच्या पात्रात कोसळला. पुराच्या प्रचंड प्रवाहामुळे कंटेनर सुमारे १०० ते १५० मीटरपर्यंत वाहत जाऊन एका ठिकाणी अडकला. अपघातानंतर कंटेनरमधील हजारो मॅगीची पाकिटे नदीच्या पाण्यात विखुरली. घटनेची माहिती मिळताच पोलीस, महसूल प्रशासन, अग्निशमन दल तसेच एनडीआरएफचे पथक घटनास्थळी दाखल झाले. मात्र अंधार, मुसळधार पाऊस आणि नदीतील वेगवान प्रवाहामुळे बुधवारी रात्री बचावकार्य मर्यादित ठेवावे लागले.
गुरूवारी सकाळी खेडचे उपविभागीय अधिकारी यांच्या मार्गदर्शनाखाली बचावमोहीम पुन्हा सुरू करण्यात आली. एनडीआरएफच्या जवानांनी दोन बोटींच्या सहाय्याने नियोजनबद्ध पद्धतीने नदीत प्रवेश केला. एका बोटीत बचाव पथक, तर दुसऱ्या बोटीत जनरेटर आणि आवश्यक उपकरणे नेण्यात आली. प्रतिकूल परिस्थितीचा सामना करत जवानांनी कंटेनरपर्यंत पोहोचून केबिनमध्ये प्रवेश केला आणि अनेक तासांच्या अथक प्रयत्नांनंतर चालकाचा मृतदेह बाहेर काढला. त्यानंतर पोलिसांनी पंचनामा करून मृतदेह पुढील वैद्यकीय व कायदेशीर प्रक्रियेसाठी ताब्यात घेतला. या बचाव मोहिमेत एनडीआरएफ, पोलीस, महसूल प्रशासन आणि स्थानिक यंत्रणांनी समन्वयाने काम करत उल्लेखनीय कार्य केले.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
