रत्नागिरी | प्रतिनिधी- रत्नागिरी शहरातील विश्वनगर परिसरातील बँक ऑफ महाराष्ट्रच्या एटीएममध्ये हातचलाखी करून महिलेचे एटीएम कार्ड बदलत तब्बल ₹५७,७०० ची फसवणूक केल्याचा धक्कादायक प्रकार उघडकीस आला आहे. या प्रकरणी रत्नागिरी शहर पोलिसांनी सुरत येथील एका संशयिताविरुद्ध गुन्हा दाखल करून पुढील तपास सुरू केला आहे.
पोलिसांनी दिलेल्या माहितीनुसार, स्मृतिका संजय पाटोळे (वय ५८, रा. उद्यमनगर रोड, रत्नागिरी) या २० जुलै रोजी सकाळी साडेअकराच्या सुमारास विश्वनगर येथील बँक ऑफ महाराष्ट्रच्या एटीएममध्ये व्यवहारासाठी गेल्या होत्या. त्यावेळी धीरजकुमार मोहनलाल पांचाळ (वय ४१, रा. सुरत, गुजरात) याने हातचलाखीने त्यांचे एटीएम कार्ड बदलून त्यांच्या हातात दुसरे कार्ड दिले.
यानंतर आरोपीने पाटोळे यांच्या खात्यातून ₹५०,००० रोख रक्कम काढली, तसेच शहरातील एका वाइन मार्टमध्ये कार्डद्वारे ₹७,७०० ची खरेदी केली. अशा प्रकारे एकूण ₹५७,७०० रुपयांची आर्थिक फसवणूक करण्यात आली.
घटनेची माहिती मिळाल्यानंतर रत्नागिरी शहर पोलिस ठाण्यात आरोपीविरुद्ध भारतीय न्याय संहिता (BNS) २०२३ अंतर्गत कलम ३१६(२), ३१८(२) आणि ३१८(४) नुसार गुन्हा दाखल करण्यात आला असून, पोलिस पुढील तपास करत आहेत.
नागरिकांसाठी आवाहन :
एटीएममध्ये व्यवहार करताना अनोळखी व्यक्तीची मदत घेऊ नका. एटीएम कार्ड, पिन आणि बँकिंग माहिती कोणालाही देऊ नका. व्यवहारानंतर कार्ड तपासूनच एटीएममधून बाहेर पडा.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
