संगमेश्वर : सह्याद्री व्याघ्र प्रकल्पाच्या कामकाजात धक्कादायक आणि गंभीर अनियमितता झाल्याचा आरोप समोर आला आहे. रत्नागिरी जिल्ह्यातील संगमेश्वर तालुक्यातील बामणोली हे गाव व्याघ्र प्रकल्पाच्या अधिसूचित बफर क्षेत्रात असताना, नावातील साधर्म्याचा आधार घेत कोट्यवधी रुपयांचा विकास निधी सातारा जिल्ह्यातील जावली तालुक्यातील कसबे बामणोली येथे खर्च करण्यात आल्याचा आरोप वन्यजीव अभ्यासक संतोष जाधव यांनी केला आहे.
या प्रकारामुळे राष्ट्रीय व्याघ्र संवर्धन प्राधिकरण (NTCA) तसेच सर्वोच्च न्यायालयाच्या मार्गदर्शक तत्त्वांचे उल्लंघन झाल्याचा दावा करण्यात आला असून, संबंधित अधिकाऱ्यांवर कारवाईची मागणी जोर धरू लागली आहे.
मिळालेल्या माहितीनुसार, रत्नागिरीतील संगमेश्वर तालुक्यातील बामणोली हे गाव सह्याद्री व्याघ्र प्रकल्पाच्या अधिकृत अधिसूचनेतील बफर क्षेत्रात समाविष्ट आहे. त्यामुळे व्याघ्र प्रकल्पाचा पर्यटन व विकास निधी केवळ या अधिसूचित क्षेत्रातील गावांवरच खर्च करणे बंधनकारक आहे. मात्र, तत्कालीन अधिकाऱ्यांनी नावातील साम्याचा आधार घेत हा निधी जावली तालुक्यातील कसबे बामणोली येथे वळविल्याचा गंभीर आरोप करण्यात आला आहे.
या प्रकरणात आणखी एक धक्कादायक बाब समोर आली आहे. डॉ. श्यामाप्रसाद मुखर्जी जन-वन विकास योजनेअंतर्गत कसबे बामणोली येथे इको-डेव्हलपमेंट समिती कार्यरत करून लाखो रुपयांचा शासकीय निधी वितरित करण्यात आल्याचे सांगितले जात आहे. मात्र, हे गाव सह्याद्री व्याघ्र प्रकल्पाच्या कोअर किंवा बफर क्षेत्रातच येत नसेल, तर या समितीला प्रशासकीय मान्यता कोणत्या नियमांनुसार देण्यात आली आणि निधी कोणाच्या आदेशावर वितरित करण्यात आला, असा गंभीर सवाल उपस्थित करण्यात आला आहे.
या संपूर्ण प्रकरणामुळे वन विभागाच्या कारभारावर प्रश्नचिन्ह निर्माण झाले असून, शासकीय नोंदींमध्ये तातडीने दुरुस्ती करून संबंधित अधिकाऱ्यांची जबाबदारी निश्चित करण्याची मागणी होत आहे. तसेच दोषींवर कठोर कारवाई न झाल्यास मुंबई उच्च न्यायालयात जनहित याचिका दाखल करण्याचा इशाराही देण्यात आला आहे. त्यामुळे सह्याद्री व्याघ्र प्रकल्पातील निधी खर्च आणि प्रशासकीय निर्णय प्रक्रियेची सखोल चौकशी करण्याची मागणी आता अधिक तीव्र झाली आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
