देवरूख– रत्नागिरी जिल्ह्यातील राजापूर तालुक्यातील पत्रकार शशिकांत वारिशे यांच्या संशयास्पद अपघाती मृत्यूप्रकरणी संगमेश्वर तालुका प्रेस क्लबच्यावतीने देवरुख पोलीस ठाणे, संगमेश्वर पोलीस ठाणे व तहसिलदार यांना निवेदन देत दोषींवर कठोर कायदेशीर कारवाई करण्याची मागणी करण्यात आली आहे. तसेच या घटनेचा संगमेश्वर तालुका प्रेस क्लबतर्फे निषेध व्यक्त करण्यात आला आहे.
यावेळी संगमेश्वर तालुका प्रेस क्लबचे अध्यक्ष सचिन मोहिते, उपाध्यक्ष संतोष पोटफोडे, उपाध्यक्ष मिलिंद चव्हाण, सचिव निलेश जाधव, सहसचिव मिथून लिंगायत, खजिनदार सुरेश करंडे, सदस्य दिपक भोसले, मकरंद सुर्वे, प्रमोद हर्डीकर, अमृतराव जाधव, मीरा भोपळकर आदि उपस्थित होते. पत्रकारांवर होत असलेले हल्ले हे पुर्वनियोजित असल्याचे दिसून येत असल्याने या घटनांचा निषेध करावा तितका कमी आहे. लोकशाहीचा चौथा स्तंभ असलेले पत्रकार हे आपल्या पत्रकारीतेचे काम प्रामाणिकपणे करीत असतात. परंतु काहीवेळा पत्रकारांवरच हल्ल्याच्या घटना घडत असतात. या घटना वाढीस लागल्या आहेत. त्यामुळे पत्रकारांची सुरक्षितता धोक्यात आली असल्याची भावना पत्रकारांमध्ये आहे. पत्रकारांवर हल्ले करून एकप्रकारे पत्रकारांची गळचेपी करण्याचा प्रयत्न केला जात आहे.
याला कुठेतरी आळा बसणे आवश्यक बनले आहे. पत्रकार हल्लाविरोधी कायदा करण्यात आला आहे. परंतु या कायद्याची कडक अंमलबजावणी व्हावी, अशी अपेक्षा पत्रकारांमधून व्यक्त करण्यात येत आहे. तसेच पत्रकारांना संरक्षण व सुरक्षिततेसाठी शासनाने प्राधान्य द्यावे, अशी भावनाही पत्रकारांमधून व्यक्त केली जात आहे. राजापूर तालुक्यातील पत्रकार शशिकांत वारिशे यांच्या संशयास्पद अपघाती मृत्यू प्रकरणातील दोषींवर कठोर कारवाई करण्यात यावी, यासाठी संगमेश्वर तालुका प्रेस क्लबतर्फे देवरूख पोलीस ठाण्याचे निरीक्षक प्रदीप पोवार, संगमेश्वर पोलीस ठाण्याचे निरीक्षक उदयकुमार झावरे व नायब तहसिलदार सुदेश गोताड यांना निवेदन देण्यात आले आहे. संगमेश्वर तालुका प्रेस क्लबतर्फे पत्रकार शशिकांत वारिसे यांना श्रध्दांजली वाहण्यात आली.
जाहिरात :
