मुंबई- मराठी अभिनेता श्रेयस तळपदे याला हृदयविकाराचा झटका आल्याची माहिती समोर आली आहे. श्रेयसला मुंबईतील अंधेरीच्या बेलेव्ह्यू रुग्णालयात दाखल करण्यात आले आहे. हृदयविकाराच्या झटक्यानंतर श्रेयस तळपदेवर तातडीने अँजिओप्लास्टी करण्यात आली असल्याचं रुग्णालयाकडून माहिती देण्यात आली आहे. श्रेयस तळपदे आज ‘वेलकम टू द जंगल’ या चित्रपटाचे शूटिंग करत होता आणि शूटिंग संपल्यानंतर तो घरी पोहोचला तेव्हा त्याला छातीत दुखू लागल्याने त्याला तातडीने रुग्णालयात नेण्यात आले.
सध्या अँजिओप्लास्टीनंतर त्याची प्रकृती स्थिर असल्याचे सांगण्यात येत आहे. मात्र रुग्णालयाने सध्या कोणतेही वैद्यकीय बुलेटिन जारी केलेले नाही. श्रेयस तळपदे या मराठी तसेच हिंदी सिनेसृष्टीला नावाजलेला अभिनेता आहे. त्याने आतापर्यंत अनेक दिग्गज कलाकारांसोबत काम केलं आहे. दरम्यान श्रेयसच्या प्रकृतीबाबतच्या या बातमीने सर्वांनाच धक्का बसला असल्याचं सांगण्यात येत आहे.
श्रेयस गुरुवार १४ डिसेंबर रोजी वेलकम टू जंगल या सिनेमाच्या शुटींगला गेला होता. त्याच्या वेळेनुसार तो सेटवर देखील पोहचला. माहितीनुसार, तो सेटवर सगळ्यांशी व्यवस्थित आणि हसून खेळून बोलत होता. त्याने दिवसभर शुटींग देखील केले आणि तो पूर्णपणे ठिक होता. त्याने काही अॅक्शन शोट्स देखील शूट केले. त्यानंतर तो घरी परतला आणि त्याने त्याची पत्नी दिप्ती हिला सांगितले की, थोडं अस्वस्थ वाटतंय. तिने तातडीने त्याला रुग्णायलात नेले पण वाटेतच श्रेयसला हृदयविकाराचा झटका आला.
