दिवा प्रभाग समिती सहाय्यक आयुक्त व धमकी देणाऱ्यांवर कारवाई करण्याची मागणी ; दिवा भाजपचे अध्यक्ष रोहिदास मुंडे
ठाणे : (कार्य.स.निलेश घाग) दिव्यातील अनधिकृत बांधकामांवर कारवाई होत नसल्याच्या निषेधार्थ मुख्यमंत्री निवासस्थानाबाहेर उपोषण करण्याचा निर्वाणीचा इशारा दिवा शहर भाजपचे मंडळ अध्यक्ष रोहिदास मुंडे यांनी पालिका आयुक्तांना पत्राद्वारे दिला आहे.
दिवा प्रभाग समिती सहायक आयुक्त प्रितम पाटील हे अनधिकृत बांधकामांना अभय देत असून यामुळे स्मार्ट सिटी, क्लस्टर यासारख्या महत्वकांक्षी प्रकल्पांना बाधा निर्माण होत असल्याचे रोहिदास मुंडे यांनी आयुक्तांना दिलेल्या निवेदनात म्हटले आहे
दिव्यातील अनधिकृत बांधकामाबाबत पुराव्यासह तक्रारी दिलेल्या आहेत. मात्र आपल्याकडून अद्याप दिवा प्रभाग समिती मधील अनधिकृत बांधकामावर कोणतीही कारवाई करण्यात आलेली नाही. उलट पक्षी या अनधिकृत बांधकामांना पालिकेचे अभय आहे की काय? अशी शंका मला आहे.
प्रभाग समिती सहाय्यक आयुक्त प्रीतम पाटील, माजी उपमहापौर रमाकांत मढवी यांच्या आर्थिक हितसंबंधातून दिवा शहरात अनधिकृत बांधकामे राजरोस सुरू आहेत. स्लॅब मागे तीन लाख रुपये घेतले जात आहेत.
याचा परिणाम दिव्यातील नागरिकांना सोयी सुविधा मिळत नाहीत. लोकांना प्यायला पाणी नाही. पिण्याचे पाणी अनधिकृत बांधकाम करण्यासाठी दिले जात आहे असा गंभीर आरोप रोहिदास मुंडे यांनी केला आहे. दिवा शहर बकाल केले जात असून क्लस्टर योजनेच्या उद्देशाला महापालिका हरताळ फासत असल्याचे त्यांनी म्हटले आहे.
महानगरपालिकेच्या माध्यमातून दिव्यात अनधिकृत बांधकामावर कारवाई होत नसल्याच्या निषेधार्थ रोहिदास मुंडे यांनी २० जुलै रोजी मा.मुख्यमंत्र्यांच्या ठाण्यातील निवासस्थानाबाहेर उपोषणाला बसण्याचा निर्वाणीचा इशारा पालिका प्रशासनाला दिला आहे.
मा. पंतप्रधान नरेंद्र मोदी साहेब यांच्या स्वप्नातील स्मार्ट सिटी ठाण्यात व्हावी ही आमची भूमिका असून अनधिकृत बांधकामामुळे दिवा शहर बकाल होण्यास जबाबदार असणारे निलंबित होत नाहीत तोपर्यंत माझे आंदोलन सुरू राहील असेही मुंडे यांनी म्हटले आहे.
