राज्याचे उपमुख्यमंत्री अजित पवार यांच्याकडे पुन्हा एकदा पुण्याचं पालकमंत्रिपद आलं आहे. चंद्रकांत पाटील यांना पुण्याऐवजी दोन जिल्ह्यांची जबाबदारी देण्यात आली आहे.
अजित पवार पुण्याचे पालकमंत्री चंद्रकांत पाटील यांच्याकडे सोलापूर अमरावती
पुणे भाजपची भीती खरी ठरली राज्याच्या तिजोरीच्या किल्ल्या अजितदादांकडे, बारामतीत जनता दरबार, कामं आवरायला लोकांची भली मोठी रांग
मुंबई : महाराष्ट्राच्या राजकारणात वेगवान घडामोडी सुरु आहेत. मुख्यमंत्री एकनाथ शिंदे आणि उपमुख्यमंत्री देवेंद्र फडणवीस हे काल दिल्लीच्या दौऱ्यावर होते. उपमुख्यमंत्री अजित पवार हे कालच्या कॅबिनेट बैठकीला देखील उपस्थित राहिले नव्हते. प्रकृतीच्या कारणामुळं अजित पवार मंत्रिमंडळ बैठकीला उपस्थित नव्हते, असं सांगण्यात आलं होतं. आज राज्याचे मुख्यमंत्री एकनाथ शिंदे यांनी राज्यातील ११ जिल्ह्यांचे पालकमंत्री जाहीर केले आहेत. यामध्ये पुण्याचं पालकमंत्रिपद पुन्हा एकदा अजित पवार यांच्याकडे गेलं आहे. तर, चंद्रकांत पाटील यांना सोलापूर आणि अमरावती जिल्ह्याची जबाबदारी देण्यात आली आहे. पुण्याचं पालकमंत्रिपद अजित पवार यांनी मिळवून महायुतीतील त्यांचं महत्त्व अधोरेखित केलं आहे. पुणे भाजपला जी भीती वाटत होती ती अखेर खरी ठरलीय. तर, अजित पवार यांच्यासाठी भाजपला त्यांचे मातब्बर नेते चंद्रकांत पाटील यांचं पुनर्वसन सोलापूर आणि अमरावती जिल्ह्यात करावं लागलं आहे.
अजित पवार यांचं महायुतीतील महत्त्व अधोरेखित
अजित पवार २ जुलै रोजी त्यांच्या ८ सहकाऱ्यांसह मुख्यमंत्री एकनाथ शिंदे यांच्या मंत्रिमंडळात सहभागी झाले होते. अजित पवार यांच्याकडे उपमुख्यमंत्री देवेंद्र फडणवीस यांच्याकडे असलेलं वित्त खातं देखील देण्यात आलं. अजित पवार अर्थमंत्री बनले. राज्यातील सत्तेत सहभागी झाल्यानंतर वित्त खातं मिळालं तरी अजित पवार पुण्याचे पालकमंत्री होण्यासाठी आग्रही होते. अजित पवारांचा गट सत्तेत आल्यानं पुण्यातील जिल्हा नियोजन विकास आराखडा म्हणजेच डीपीडीसीचा निधी रखडला होता. भाजप आणि शिवसेना शिंदे गटाच्या आमदारांच्या निधीचं वाटपाचं सूत्र ठरलं होतं, अजित पवार गटाच्या आमदारांना निधी कसा द्यायचा हा प्रश्न निर्माण झाल्यानं तो निधी रखडला होता. आता अजित पवार यांना पुण्याचं पालकमंत्रिपद मिळालं आहे.
अजित पवार यांनी सर्वाधिक काळ पुण्याचे पालकमंत्री म्हणून काम केलं आहे. काँग्रेस आणि राष्ट्रवादीची सत्ता असताना देखील २००४ ते २०१४ या कालावधीत अजित पुण्याचे पालकमंत्री होते. महाविकास आघाडीची सत्ता आल्यानंतर ते पुन्हा पुण्याचे पालकमंत्री बनले होते.
चंद्रकांत पाटील यांचं पुनर्वसन कुठं?
चंद्रकांत पाटील यांच्याकडे पुण्याचं पालकमंत्रिपद भाजपचे दिवंगत नेते गिरीश बापट हे २०१९ च्या लोकसभा निवडणुकीत विजय मिळाल्यानंतर आलं होतं. देवेंद्र फडणवीस यांच्या मंत्रिमंडळातील ते प्रमुख नेते होते. देवेंद्र फडणवीस यांच्यानंतर राज्यातील भाजपचे पॉवरफुल नेते अशी त्यांची ओळख त्या काळात होती. २०१९ ची विधानसभा निवडणूक देखील चंद्रकांत पाटील यांनी कोथरुड या मतदारसंघातून लढवली होती. राज्यात एकनाथ शिंदे यांचं सरकार आल्यानंतर चंद्रकांत पाटील यांच्याकडे उच्च व तंत्र शिक्षण मंत्रिपद देण्यात आलं. तर, पुण्याचं पालकमंत्रिपद सप्टेंबर २०२२ मध्ये त्यांच्याकडे आलं. साधारणपणे एक वर्षाचा कालावधी पार पडल्यानंतर चंद्रकांत पाटील यांना पुण्याचं पालकमंत्रिपद सोडावं लागलं आहे. चंद्रकांत पाटील यांच्याकडे आता सोलापूर आणि अमरावतीचं पालकमंत्रिपद देण्यात आलं आहे. सोलापूर यापूर्वी राधाकृष्ण विखे पाटील यांच्याकडे होतं तर अमरावतीचं पालकमंत्रिपद हे उपमुख्यमंत्री देवेंद्र फडणवीस यांच्याकडे होते. आता चंद्रकांत पाटील यांच्याऐवजी पुण्याचा कारभार अजित पवार पाहतील.
पुणे भाजपची भीती खरी ठरली
अजित पवार एकनाथ शिंदे यांच्या मंत्रिमंडळात उपमुख्यमंत्री होताच पुणे शहर भाजपला पुण्याचं पालकमंत्रिपद चंद्रकांत पाटील यांच्या हातून जाईल अशी भीती वाटत होती. भाजपनं पुण्यातील आणि पिंपरी चिंचवडमधील काँग्रेस आणि राष्ट्रवादी काँग्रेसचं वर्चस्व मोडून काढलं होतं. अजित पवार यांच्याकडे पुण्याचं पालकमंत्रिपद पुन्हा गेल्यास भाजप नेत्यांना निधी मिळवण्यात अडचण निर्माण होईल, अशी भीती जुलै महिन्यातच काही नेत्यांनी बोलून दाखवली होती. पुणे शहरातील ८ आमदारांपैकी ५ आमदार हे सध्या भाजपचे आहेत. २ राष्ट्रवादीचे तर १ काँग्रेसचा आहे. आगामी काळात हे समीकरण देखील बदलू शकतं अशी भीती देखील भाजप कार्यकर्त्यांना वाटत होती.
दरम्यान, पुणे जिल्ह्यात विधानसभेचे २१ मतदारसंघ असून त्यामध्ये राष्ट्रवादीकडे १०, भाजपकडे ८ तर काँग्रेसकडे ३ आमदार आहेत.
